Jowai: Ka Jingiaseng Samla Balang Presbyterian Jowai, lyngba ka Social Committee ha kani ka 26 tarik da kynmoo warom ko ya ka lyngkhooh dap 9 snem ka “Blood Donation Cell” kawa man kawi naki tnat wa da yakrehlang waka Dr. Norman Tunnel Hospital Jowai wow e i chakri ya ki paidbah deiwa e sñiawbha yei snaam neibynta u yarap pynim yei mynsien wa kordor.
Ya kani ka yalang kynmoo warom da pynman ha hall ka Jowai Presbyterian Higher Secondary School haka yalang wada pyllai da u D. Passah chirup wei emlang ki dkhot ka Jingiaseng Samla wa kiwi kiwi ki dkhot ka Balang.
U Dr. Banjop Dkhar naka Dr. Norman Tunnel Hospital Jowai da ong u waka hospital ymye de ko u su yei kyrkhu wada yoh na kani ka Balang ha kini ki 9 snem lyngba ka Jingiaseng Samla, wei da yaroh u ya kani ka Balang wa da chim sakhiat ko ka bynta wa khroo wa kyrpang tam dei wow e sñiawbha yei snaam cha ki para bru wa emkaam yarap. Neibhah ong u wa da em boon bha ki mynsien bru da ye u pynim lyngba ki snaam wa yoh na kani ka balang neibhah ha hospital i emkaam snaam dawa bha ko khamtam ya ki bru wa kha khonboo, kiwa accident wa kiwi.
Da ong u leh wa ye u ong kani ka balang da chakri sakhiat ko ya ki bru neibhah nadooh kiwa wan na kiwi tawon ki balang, ki niam, kamjooh kiwa dang man chnong leh boon kiwa da lait im lyngba ki snaam wada e sñiawbha ki khon yong ka, kamtæ yooluti u wow man ko leh ka nongmuna ya kiwi tawon u bood ki yei luti wa lai ko.
Kiwi won wa e i klam kynthup ki ya u Rev. E.Nongpluh, i duwai na u Tbn B.L.Khonglah wa kiwi kiwi.
Ha kani ka sngi da pynkup burom leh ya arngut ki dkhot ka seiñ wa jooh e snaam kiwa da chong ngiah wa kynthup ya u Tbn Y. Shylla waka Chewandaka Chullai wei da pynkup burom leh ya ki 4 ngut ki dkhot thymme wa dang dep e snaam na pyrdi ki 10 ngut ki dkhot thymme wa dang pynpsiah pyrtuid.
Discussion about this post