Nadooh wa thung ya kiwa krehkaam, ki dkhot ka Executive Committee ha ka 19-01-2021 ha ka yalang wa pynman ha yung dorbar ka Lion Mission Compound, Dorbar Chnong Jowai da dap pura chi snem wa da krehkaam ka Khooid Ya Ka Wah Myntdu ha ka yurim “Chirup u yakrehlang i”.
Kamtæ ha kini ki bnai kiwa dadep ka seiñ da leh ko chiboon ki kaam nadooh wow ujor pyrchah ya kiwa leh ya ki kaam wa ktah ya ka wah Myntdu wei ini wa dep da pynman leh ya ka lai paidbah yow pynsñiawthooh paidbah yei emkaam wow yada ya ka wah Myntdu wa da wan chimbynta da kiwa yahkhmat niam, kiwa yahkhmat chnong, ki khynroo khyllood wa kiwi kiwi.
“Kamwa man katni, sñiawthooh i wa i yaleh i yong i da lai i ha ka luti kawa bha kawa daw poi ha iwa da mut da mang i waroh, yow im yow chngaaiñ ka manbru longbru chirup wa ka wah Myntdu ka bei-rymaw yong i, lada ym yoh de kam nachwa ki ar lephaw snem, tangwa ka mynstep ka mynried daw im daw chngaaiñ chooh chooh chirup hei kdung ka wah Myntdu deiwa ya krehlang yow nang pynkhlan chooh chooh i ya iwa da sñiawthooh i wa u im u chngaaiñ ka manbru deiwa pynbha ya ka wah Myntdu,” da ong ka seiñ.
Kamtæ da pynkynmoo biang ya phi kiwa chong chnong, deiwa kyntu ya waroh wow dam noh u pynemkaam jri pynemkaam Plastic kam hawa dih um, dih cha, i song baam song dih hawa em wa khlaad, hawa em i khawai ha yung ha loom namo ha ki thaw yalang paidbah wa ha i rah i rong.
Ka Wyrta ya waroh yow dam u noh Plastic, noh jhep kat cha wa yoh wa suk, khamtam hapoh ki liar ki chka. U kyrpaad lang ya waroh ki bru, yow dam u thang diñ sympoor ha kani ka tlang ka pyrhaw, u deiñ ya ki dieñ, ki kseh ha chrooh ha kdung ki tyllong um, yow nang yoh la’er u riñ mynsien da kawa khooid wa pyngngad, ka um dih um sait da kawa khooid wa jngiar. Khamtam yow nang im nang roi ki mrad, ki sim ki doh ha loom ha thwai, wa ki phlang ki rnem, kiwa man dawai ya u bru ya u mrad yow im yow roi chooh chooh ki, kamwa da booh da kyntang u Blai ya ki yow im yow chngaaiñ i ki bru, pynkut ka kyrwoh na ka Khooid Ya Ka Wah Myntdu.
