Dap chi snem khlem yoh ya kiwa tynyap ya ka Mantip Langstang, pynman ka JSM dei lai paidbah

Ka 16 tarik u Kmaichonglad (Dec) 2021 da man ko ka sngi dap chi snem i chah tynyap dusmon ka Mantip Langstang ka khynnah skur yong ka Tia Chaphrang Hr. Sec. School Sohkymphor ha ki bru damok ki wym put tipmit hadooh katni leh.

Kamtæ neiliang ka seiñ Jaiñtia Students’ Movement (JSM) Women’s Wing waka JSM Eastern Region chiruplang wa ki kur ki kha kiwa hayung hasem yong ka Mantip, ki khynnah skur, kiwa sikai yong katai ka skur kamjooh wa ki bru paidbah da i sñiaw chrai wei wow pynrem joor yei tlot i krehkaam ki bor yong ka aiñ hawa hadooh wa dap chi snem i chah tynyap beiñ yong ka Mantip ym ye wow kem ya kiwa emkti ha ini i kaam, wei la kamni i rukom daw pynchlur chooh chooh ya kini ki kaam pyntieñ pynsyier ya ka mynried ka mankawi yong ki khynnah kynthai.

Kam i dak wow pynkynmoo cha ka sorkar wa cha ki bor yong ka aiñ, da pynman da ka lai paidbah iwa da sdang nadooh ka skur Tia Chaphrang Hr. Sec. School Sohkymphor, Ladsohkymphor ter ter chadooh yung krehkam u Deputy Commissioner, Khliehriat deiwa rahlang ya ki Placard, i kbai wa i jingthang mombati wow dawa pynyoh yei hok. 

Ha chwa woow sdang ya ka yalang wa tbian da em i ya suki kiaw iwa chi minit.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha kani ka yalang da yoh yei klam na ka Nidaialam Dkhar kawa man ka President yong ka JSM Women’s Wing Central Body kawa da khana wa neiliang ka seiñ ym em chong ngiah heiwa neipor cheipor da lai booddien wei da lai yachem wa ki bor yong ka aiñ yow dawa pynyoh yei hok ka Mantip kawa da chah tynyap beiñ tangwa iwa sñiawsih won wa ki bor yong ka aiñ hadooh katni ym ye ki wow kdong wei wow pynchitom ya ki damok wa emkti.

Ha kani ka yalang da yoh leh yei klam beiñ wa i klam dawa wow pynyoh yei hok yong kawa da dooh yei mynsien na ka Victoria Suiam, ka Yooluti Suchiang kawa man ka Principal yong ka skur, na u Chibaitmi Langstang neiliang ka kur, u Reachingson Siangshai, u President Rangbah ka AJYWO, u Shwari Ryngkhlem, u General Secretary ka KSU Wapung Unit, u Wellson R D Siangshai, President JSM Eastern Region wei neiliang ki khynnah skur da yoh yei klam na ka Beautiful Lyngdoh.