Shillong: Ha iwi i jia wa sñiawsih ha Khliehshnong, Mawlynrei, EKH kawi ka manbei wa tip kam ka Rilang Pyngrope da dat ko ya u khon ko uwa dang 14 snem da u dieñ thlieh hadooh wa yap u ha ka 29 tarik uni u bnai.
Kani ka manbei da dat ko ya uni u khynnah neidaw wa pynhaap poisa u wa T. 10 wa phah thied jhoor wei manda poi u ha yung heipor kamwa 6:30 i miet da bom da choh ka bei u oo hadooh wa heipor 3 waje i step ka 30 tarik da khlaad u.
Uni u khynnah toh uwa lai skur step wei leh u ya waroh i kaam yung nadooh wow chet u tu, u sait u pynkhooid wow pait sumaar diah hadooh ki diah u da khut ki ya oo ‘Mei’.
Ha u snem 2016 ka bei u da dait ka oo ha ki 6 thaw hei doh u wei dat ko na khleikyrsu hadooh wym ye de u lai wei da kit ya oo cha Hospital da ki pulit wei da pynman leh ya ka takit tangwa ym em pynchitom ya kani ka manbei.
Ha kani ka 29 tarik won hadien wa dat biang ko ya u khon ko hadooh wa da yaplær u ka diah yong kani ka manbei da pyntip ko wa kani ka manbei ym nood de ko wow kit oo cha hospital neidaw wa tieñ ko boi tip ki pulit ya ini wei ye u chah kem ko.
Ki jan yung da ong ki wa uni u khynnah toh uwa emsalon haddooh kattæ ym em wa haap phah ya oo wow leh ya ki kaam ha yung.
Kani ka manbei toh kawa pun khon la 5 bnai em ko sa arngut ki khon chynrang wa 3 wa 8 snem wei u pa toh uwa ym em de yachong wa ki.
Ki pulit da pyllait ki ya kani ka manbei ynnin hadien wa yoh jamin ko neidaw wa ong ko wa ym chait ko.
Discussion about this post