Shillong: U montri rangbah ka jylla, u Conrad K Sangma ynne ka sngi da booddien u ya ki kaam wa yatoh wa ki luti rel wa ki rel hapoh jylla deiwa ong wa ym slem de daw chim ya ka rai hadien wa ap ya waroh kiwa chah ktah ha kani ka kaam.
Kini ki ar tylli luti rel kynthup ki ya ka 21.5 km kawa tip kam ka Tetelia-Byrnihat wa ka 108 km Shillong-Byrnihat kiwa man kiwa dang sahteiñ nei pyrchah ki kattu katni ki seiñ.
Hadien ka yalang wa ki heh na ka tnat rel namo ka Railways ynne ka sngi, u Conrad da pyntip u wa ya ka yalang da khut wow booddien ya ki kaam wa yatoh wa ka rel hapoh ka jylla.
Da ong u wa kani ka kaam kynjoh ko kamwa T. 8,000 klur wa da pynlait da ka sorkar pyrdi neibynta kini ki ar tylli ki kreh.
Da pyntip u leh wa da chong yalang u ha ki kattu katni ki kynti wa u montri ka tnat Railways, u Piyush Goyal uwa da sñiawkhia hajrong i sakhut wow pynkrehkaam ya kini ki project.
Heiyatoh wa ini i kaam ka sorkar MDA wa yahkhmat da ka NPP, u montri rangbah da ong u wa ka rel man ko kawi na ki bynta wa khroo wa ye u pynhiar dor ya ki mar kamjooh wow yarap yei khayi pateiñ.
Chooh chooh da ong u wa em chiboon ki phang wa ktah ya ki tre jylla wa ki myntoi wei emkaam u ap kammon sniaw waroh ki liang.
Da ong u leh wa hadien ini i booddien, neiliang yong ka dhab ki montri sorkar daw chong pyrkhat ko kammon wow lai chaphrang yeini.
Heiyatoh wei chah pynthut hajrong wow pynkreh yeini waroh, u Conrad da ong u wa daw chong yaklam wa waroh ki seiñ saiñ hima wa ki seiñbhalang chwa wow lai chaphrang hajrong ini i kaam.
Da pynksan chooh chooh u Conrad wa kini ki project toh neibynta ki luti rel ya kiwa ye u pynemkaam heiwon iwon i por lada wow kit mar namo ya ki bru.
Discussion about this post