Daw bien ka NDA wow e ya ka chuki u Deputy Speaker cha ka Liang Pyrchah?

Hadien wa ka Liang Pyrchah da dawa ko wa ka chuki u Lok Sabha Deputy Speaker toh u lai ko cha ki yow kyrchaan ki ya u kyrtong ka NDA kam u Speaker tangwa ini da chah kyntait noh i, iyi wow jia kattu?

U heh ka Congress, u Rahul Gandhi dadep u wow tyrwa cha u Rajnath Singh wow e cha ki ya ka chuki u Deputy Speaker yow e kyrchaan ki ya u Om Birla kam u Speaker ha ka 25 tarik uni u bnai, tangwa i jied Speaker da lai bait i khlem da pynbait lada daw jied ya u Deputy Speaker.

Kam wow kdaw heini wa ka chuki Deputy Speaker da man ko kawa thylli nadooh u snem 2019 neidaw wym em ka Liang Pyrchah heiwa ka Congress da joor duna paaid ko. Kamtæ nadooh u 2014 hadooh 2019 da ksoh da u M. Thambidurai uwa naka AIADMK uwa em ha ka sorkar NDA.

Kamwa jooh man ka rukom, ya ka chuki u Deputy Speaker da jooh e cha ka Liang Pyrchah iwa da dawa ki katni neidaw wa da boon ki hapoh ka Lok Sabha ha kani ka kynti, heiwa ha kiwa boon hi ki por ya ka chuki u Speaker da lai ko cha ka liang synchaar.

Related posts

Ym em aiñ wa ye u khang ya kiwa chongdai ha Khyndailad, u Paul ym tip u yeini: MGSPHSVA

November 24, 2024

Waroh chimiet neh kiwa chongdai madan ha Khyndailad yow pyrchah yei chah kyrriah

November 24, 2024

Na ini i daw ka Liang Pyrchah da pyrchah ko yeini wym e Deputy Speaker cha ki neibhah kamwa man kattæ ym em bood ka sorkar NDA ya ka rukom wa jooh leh hapoh Parliament.

Ka NDA won da jubab ko wa bien hi ko wow yaklam ya ka chuki u Deputy Speaker manda toh i por tangwa ymtoh deiwa booh kyndon chwa.

Ka Congress da ong ko wa ka BJP la arsien da pyndam ko yei jied Deputy Speaker deiwa ong wym em Liang Pyrchah neidaw wa duna paaid ha u snem 2014 wa ha u 2019, tangwa kattæ won da boon paaid ileh won ym e ya ka chuki u Deputy Speaker?

Da kdaw ki leh wa heipor u Dr. Manmohan Singh, u Atal Bihari Vajpayee wa u PV Narasimha Rao kam ki PM, da e ki ya ka chuki u Deputy Speaker cha u MP ka Liang Pyrchah.

Da ong ki leh wa emkaam hi wow em u Deputy Speaker yow pynstiñ yei kaam u Speaker neibhah i chong dorbar da man i awjan 7 bnai ha ka chi snem wei kawa neh 7 kynta chisien chong wei lada jia iyi iyi ya u Speaker emkaam hi wow em u Deputy Speaker yow chim yei kaam.

Yow jied ya u Deputy Speaker, daw hap booh tarik da u Speaker wei i rukom jied won man i kamwa jied ya u Speaker hi.

Ka Article 93 ka Constitution ka ri leh ong ko wa hap wow jied ya u Speaker wa u Deputy Speaker.