Hadien wa mih ka hukum wow sdang noh ya ka Integrated Teacher Education Programme (ITEP) namo ka B.Ed Course ha Kiang Nangbah Government College, Jowai. Ynne ka sngi neiliang u Riquoma Rq. Laloo uwa man u Secretary ka Synjuk Waheh Chnong Jowai (SWCJ) da e khublei u ya ka sorkar wa da pdiang ko wow sdang ya kani ka e sikai kawa da angnood bha ki khon ka Ri-loom Jaiñtia da slem bha.
Chooh chooh da ong u wa dap u dei sñiawkmen heiwa i lai luti ka Synjuk wa ka JSU da man i iwa jop wei da e khublei u leh ya u Montri ka chnat puræ puthi warim ka jylla, u Lahkmen Rymbui, wei ki daw booddien ki leh ya ki bynta wa emkaam nadooh kiwa kreh, kiwa sikai wa kiwi kiwi ha kani ka thaw puræ khnang wow suk ki khynnah hadien habood.
Neiliang u General Secretary ka JSU, u Treiborlang Suchen da ong u wa da dawa ya ka B.Ed College nadooh u snem 1987 wei katni ya ka yung kawa da mang wow pynman ya kani ka College da pynemkaam noh ya ka kam ka Kiang Nangbah Higher Secondary School wei kyrmen u wa deiwa yohbor næ da yoh yei tipmit u sdang noh kani ka e sikai B.Ed wa soo snem ha kani ka yung.
Da ong u leh wa ynne da lai yachem u ya ka Principal ka Kiang Nangbah Government College heiwa da khana ko wa dang em i duna ha kani ka thaw nadooh kiwa kreh wa kiwi kiwi khnang wow ye u sdang ka e sikai B.Ed.
Heijooh i por da ong u wa ka JAC (JSU wa SWCJ) daw booddien ki yeiwa emkaam ha kani ka thaw wei ymtoh wow yoh ko du i tipmit tangwa u man ko kawa pura namo Full Fledged.
