Ka sorkar MDA-2 wa yahkhmat da ka NPP da chim ko ya ka rai wow ya phyllu yumut hajrong i pynkrehkaam ya ka Roster System ha kani ka yalang ki Montri namo ka Cabinet Meeting wa daw man hadien wa da mih i dawa wow pyrkhat biang ya kani ka rukom pynkrehkaam.
Kam wow pynkynmoo wa da em leh i dawa wow pynman ya ka dorbar wa kyrpang hawa yatoh wa kani ka Roster System kamjooh waka Reservation Policy hadien wa sdang pynkrehkaam ya ka hukum ka High Court ka Meghalaya.
Neiliang u Symbood Montri Rangbah ka jylla, u Prestone Tynsong da ong u wa yow yaklam yeini ym emkaam ware wow pynman da ka dorbar wa kyrpang wei daw yang manda poi biang u Montri Rangbah chapoh ka jylla heiwa daw khut ya ka yalang yong waroh ki Party deiwa yaklam chwa wa kiwa em hapoh ka sorkar kamjooh ki Montri sorkar dep tæ yow chim yei rai wei hadien ini yow khut ya ka yalang yong waroh ki Party yow yatai hajrong waroh i jait.
Heiyatoh wa i hukum ka High Court, da pyntip u wa ka sorkar da dep ko wow jubab le sien ha kani ka mukotduma heiwa ka yung bichaar da ong ko nyngkong wow pynkrehkaam ya ka Roster deiwa kheiñ nadooh u snem 1972 tangwa hadien ini won, ini wa dep da pynmih hukum wow e laad ya ka sorkar wow chim ko yei rai kamtæ nadooh mynnu u kheiñ wei ini da wai ka laad wow chong yaklam yei rukom pynkrehkaam ya kani ka Roster System, da ong u Prestone.
