Daw chna da ka Mini Secretariat ha i thaw wa em ka PWD Jowai North Division

Shillong: Hadien wa mih i pyrchah wa i pynbaad wa mar kylliang heiyatoh wa i kyrriah ya ka yung krehkaam u Executive Engineer PWD (Roads) Jowai North Division, na Jowai cha Shangpung, neiliang ka sorkar ynne ka sngi da pynche ko wa i daw wa kyrriah ya kani ka yung krehkaam ka PWD toh neidaw wa ka sorkar thmu ko wow wanrah da ka Mini Secretariat hapoh Jowai neibynta ka West Jaiñtia Hills District.

Hawa yaklam wa u symbood montri rangbah ka jylla, uwa man leh u montri ka chnat PWD (Roads), u Prestone Tynsong da ong u wa hadien wa ka sorkar da yoo ko yei pynbaad na kiwa boon khamtam na ki Synjuk ki Waheh Chnong ka Jowai hajrong i rai wow kyrriah noh ya kani ka yung krehkaam na Jowai, neiliang ka sorkar kwah ko wow pyntip wa toh yow e laad wow em noh da ka Secretariat khian namo ka Mini Secretariat ka wow em lut waroh ki yung krehkaam ka sorkar du ha iwi i thaw donhi kamwa man ka Secretariat ha Shillong.

Da ong u wa ka sorkar da em ko yei thmu wow pynsuk yei rukom krehkaam ka sorkar cha ki paidbah wei da chim ko yei rai wa jhan wow pynjanai yei chakri heiwa ka sorkar da rai ko wa ha ki 2 tytlli ki District wow boh noh da ki Mini Secretariat wei hadien ha waroh 11 tylli ki District kiwa em ha ka jylla wei yeini daw sdang na West Jaiñtia Hills wa West Garo Hills, iwa mut ha Jowai wa Tura kiwa man ki District kiwa da rim tam ha ka jylla.

Katkam wa ong u Prestone, kamwa man kattæ ka yung krehkaam u Deputy Commissioner ka West Jaiñtia Hills da khynñia bha i wei ym biang wot tang ki thaw pynyieñ kari hajrong wa haap wow lai lyngba ka Iawmusiang wei hadien wa bichaar bniah ka sorkar da rai wow kyrriah noh ya ka yung krehkaam PWD Jowai North Division cha Shangpung.

Related posts

Yap uwi wa yarap wow sai ya ki ar ngut wa haap chapoh ka thlu um wa yillu 40 phut ha Jowai

July 25, 2024

Da toh ieh mylliñ ya kawi ka muna skur hawa chong Taxi ha Jowai

July 23, 2024

U Montri da ong u leh wa ka yung krehkaam PWD (Roads) Jowai North toh kawa pait du ya ki sarok ki luti syngkieñ ki 2 tylli ki Constituency kitæ ka Mowkaiaw wa ka Raliang kamtæ da kyrriah noh cha Shangpung.

U Prestone hajrong ini da ong u wa ympu ye u ong hadooh katwon u pynlut neibynta kini ki Mini Secretariat tangwa da ekti ha ka PWD (Building) wow pynkhreh ya ka DPR.