Shillong: U MDC ka Nongkrem, u Hispreaching Son Shylla da kular u wa bien hi u wow chong wow elaad ya u MLA ka Nongkrem u Ardent Miller Basaiawmoit na ka HSPDP lada ki seiñ ri-loom poi ki ha i jooh i sñiawthooh yumut.
Hawa yaklam wa kiwa pathai khubor ynne ka sngi ha Shillong Press Club, u Shylla uwa jooh man kam u MLA da ong u wa i por da ih bha wa ki seiñ ri-loom wow yawan ki ha kajooh ka lama wow yaleh pyrchah ya ka Congress wa ka BJP khnang wow yoh ki u synchaar ha kani ka jylla lyngba i yakrehlang wa ka NPP.
Da ong u wa hadien 40 snem wa ka Meghalaya da yoh ko ya ka jylla wa pura wei kam uwi na kiwa mihkhmat uwa da lai luti da yoo u yei kylla i rukom man ki kaam saiñ pyrthai ha kani ka jylla kamtæ emkaam u yatylli kam ha ki snem wa da dep hapoh ka lama wa kynthup ya ka APHLC, HSPDP wa ka PDIC wei emkaam u leh ijooh hapyrdi ka UDP, HSPDP wa ka KHNAM.
U Shylla da ong u wa oo bien u wow chong wow elaad ya u Ardent wow yakhun na Nongkrem ha kani ka election wow wan lada yatylli ki seiñ ri-loom waroh.
Wei lada ini i angnood u ym mankaam i, ym yohsa de u wow hiar madan wow yaleh MLA.
Da ong u leh wa ka jaitbru emkaam ko hadooh kattæ wow synchaar deiwa khooid wow khanglaad ya ki kaam baamtooh ha kani ka jylla kam ka laad wow yarap ya ki paidbah wa ki khynroo khyllood kiwa khlem khih khlem khan.
Da pynkut u deiwa ong wa lada ki seiñ ri-loom ym yatylli ki daw man i iwa eh wow jop ki wei daw elaad pathan ko ya ka Congress wa ka BJP kiwa synchaar ya ka jylla na Delhi.
Discussion about this post