Ka HNYF da thoh ko cha u Director ka chnat Agriculture, Meghalaya deiwa ong waka chnat i rep i riang ym sñiawthooh bha ko yei rukom mantre thaw ki jaitbru ri-loom yong ka jylla.
Ka seiñ da ong ko leh wa i mantre yaki thaw ki bhaw ha kiwa boon ki por toh iwa khlem biang ki kot ki sla wei lada em ki kot ki sla leh da leh ha i pyrtuid yong uwi u bru heiwa da rep lang da kiwa boon kiwa naka jooh ka yung ka sem kiwa da sah lang nadooh ka bei, ki khon kamjooh ki khon yong ki khon.
Ka seiñ da ong ko wa nachwa ya ini jooh lai pynsakhiat da ki wakreh ka Agriculture yei mantre thaw lyngba ki waheh chnong tangwa katni lyngba ka e-Governance ym em de leh ya ini.
Ya ini ka seiñ da leh ko hadien wa u Director ka Agriculture da thoh u cha waroh ki District Agriculture Officer ka jylla heiyatoh waka PM-KISAN Scheme wa da thap pyrtuid ki palat ya uwi næ kawi kiwa wan naka jooh ka yung iwa man pyrchah yaki kyndon yong ka Scheme. Heiwa da phah leh wow pynsakhiat yei pyrtuid ki warep kiwa da thap pyrtuid lyngba ka Online wa naki CSC wa kiwi chwa wow mynjur yei pyrtuid yong ki yow lait na iwon iwon i bakla næ i wym biang yukheiñ mynstep man kawi.
Kam wow pynkynmoo, ka PM-KISAN toh kawa e yarap poisa ka sorkar pyrdi cha ki warep kiwa em yong ki hi i thaw rep deiwa e T. 6000 chi snem.
Kamtæ ka seiñ da ong ko wa lada leh kamni daw em boon ki warep kiwa daw dooh myntoi wei toh wow lai pynsakhiat yei pyrtuid ki warep yow lait ki wow dooh yei hok yong ki.
