Ka Deputy Commissioner yong ka East Khasi Hills, ka Isawanda Laloo da lai pait ko ya ka Ïewduh ha chwa wow e laad wow wai noh ya katai ka yaw 20% ki dukan wym toh kiwa dai marbaam næ ki Non-Essential Shop, wei ha ini i lai pait da emlang leh ka Executive Member yong ka KHADC kawa pait ya ki yaw ki haat, ka Grace M Kharpuri, u SP (City) u Vivek Syiem, u Acting Syiem ka Hima Mylliem u Ainam Manik Syiem, ki Magistrate wa ki Montri ka Hima.
Ha ini i lai pait da lai pait leh ya kiwa boon ki thaw dai wa em ha Ïewduh wa kammon wow ye u pynlai wei kammon wow e laad u wai ya ka yaw deilang wa ki kyndon khamtam hawa yatoh wa kiwa chongdai madan.
Hadien i lai pait, ka Deputy Commissioner da ong ko wa ka Ïewduh toh ka yaw wa psa ya kiwa boon kiwa chong chnong wei chwa wow wai, emkaam wow pynbait khnang wa lada wai ya ka 20% toh u emlang wa ki kyndon yow lait na iwon iwon i maa. Da ong ko wa kamwa man kattæ, ka EKH dang em ko ha ka Lockdown, tangwa neiliang ka sorkar da pynbna ko wow e bor ha ki Deputy Commissioner wow pynyinsur hadooh 20% i wai ki yaw ki haat, deiwa ong leh wa deiwa chimkhia lang ka KHADC wa Hima Mylliem daw ye u pynbait ya ki dukan kammon wei ha kawon ka sngi u wai nadooh ka tayaw wow wan.
Ka DC da ong ko leh wa waroh chi kattu da e laad du ya ki dukan marbaam wa kattu katni ki dukan wa dai ya ki tiar kreh, tangwa kamwa man katni da em leh i dawa ya kiwi ki emkaam, kam ki that khonbo, ki tiar neibynta ki warep wa kiwi kiwi, wei toh hajrong ini da pynman ya i lai pait wa kammon wow e laad wow wai ya ki dukan.
Ka EM yong ka KHADC, ka Grace M Kharpuri da ong ko wa i lai pait man i wa kammon wow yarap ya kiwa chong yaw wow sdang ki wer wer ya ki kaam, tangwa man ko ha kam ini i por wa eh bha neibhah wa hap pait bha hawa yatoh wa i chait i khiah wei kamjooh wa ka khayi ka pateiñ, heiwa da pynsñiaw ko wa i wai ya ka Ïewduh u man ko katkam i pynbait ki bor District.
Da ong ko wa neiliang ka KHADC daw e ko yei ya krehlang wow phah ya ki pulit Enforcement ka Council yow paitbniah lang khnang wa ym em i tyngkheiñ ya ki kyndon da ki paidbah yow lait na i maa i yabi u khñiang kjut. Ka EM da kyntu ko leh ya ki paidbah kiwa chong yaw wa kiwa wan thied wow bood deiw rkhiñ ya ki kyndon kamwa da phah da ka sorkar.
Neiliang u Acting Syiem da ong u wa ka Hima Mylliem da e yumut wow embynta lang na ki bor District wa ka KHADC chwa wow wai ya ka Ïewduh wow pynkhreh ya ki rukom wai, yow lait na i eh wa i maa nei yabi u khñiang khlam, heiwa da kyntu leh ya ki paidbah wa ym toh wow kheiñstiñ wei wow bood ya ki kyndon wa da phah da ka sorkar khamtam wow deiñ bait ya ki Mask, ha i jooh i por da kyntu ya waroh kiwa chong chnong wow lai chim tika yow yada na u khñiang khlam.
Katkam wa pyntip u Syiem em hadooh 4000 tylli ki dukan ha Ïewduh wa kynthup lang ya ki dukan marbaam wa kiwi kiwa dai iwa ka Hima Mylliem wa ki bor District daw pynbait ki kammon wow e laad u wai. Hawa yatoh wa kiwa chong madan, u Paiem da pyntip u wa em kamwa 550 ngut kiwa chong madan wei da kyntu u ya kiwa chong madan wow yaichah ki chipor neibhah wa chwa wow e laad ya kiwa chong madan daw pynsñiawthooh chwa ha ka yalang kawa daw khut jhan noh, deiwa pynrap wa daw elaad kammon kammon ar sien chi tayaw ya ki dukan wow wai ki.
Ha iwi won i liang, u Syiem Ainam da maham eh u ya ki bru wa chim kabu ha Ïewduh wow dai kiad pyrchah ya ka aiñ, wei da klam che u wa lada chem, neiliang ka Hima daw e ko da iwa eh.
