Hadien wym mih i pyrtuid ki pulit wa kiwi de ha ka bui (Report) wa dadep leh da u Justice T. Vaiphei heiyatoh wa i chah siat yap u Cheristerfield Thangkhiew kawa da wanrah leh ha ka Yung Dorbar Chna Aiñ ynne ka sngi, da wan yakhih ka Bri U Hynniewtrep deiwa tia chajan ka yung dorbar yow pynsñiaw yei wym kmen yeini i murieh yei pyrtuid kiwa emkti.
Neiliang u Montri Rangbah ka jylla, u Conrad Sangma da ong u wa hapoh kani ka Report da klam che ko wa neidaw ki takit toh kiwa dang lai chakhmat wei em boon ki yutip wa da khana hakhmat ka Commission of Inquiry kiwa ym pu man u tip paidbah hadooh i pyrtuid ki pulit neidaw wa e u booh yei mynsien ki hei maa kamtæ toh u murieh chwa yei pyrtuid. Da ong u wa kani ka takit toh kawa laitlooid wei kawa khooid.
U Conrad da khana u wa ka takit heiyatoh i chah dawa poisa kamjooh i tympdung Bomb toh iwa dang lai chakhmat wei ym pu em kut i hadooh katni.
Da kdaw u leh wa chwa ki kaam tympdung Bomb da em boon kiwa chah dawa poisa hapoh ka jylla wei i tympdung Bomb toh iwa yatoh wa ini i kaam dawa poisa wei ki pulit da biang ka takit wow pynyoo wa u bru wa dawa poisa wa uwa pynbait ya ini i tympdung Bomb toh u jooh.
Wei chwa wow lai kem da pyntikna leh ki pulit wa ym em kiwi wa sah ha yung u Cheristerfield lait na ki khon tangwa kattæ leh da phah ya ki pulit wow syndong bha ki.
Chooh chooh da ong u wa i rai wow lai kem toh wa da tikna wa daw tympdung Bomb biang ha Shillong ha ki thaw wa boon bru kamtæ ym ye yang de wei hap wow yada yei mynsien ki bru wa lui-lui heiwa da phah ya ki pulit wow lai kem ya u Chester na yung u.
Heiyatoh wa iwa ong kani ka takit wa ki pulit wa psiah nyngkong (Tactical Team 1) wa da leh ki deiwa palat bor wei da hap ki wow bahkhlieh yeini wa jia, u Conrad da ong u wa daw khut phah pynche ya kini ki pulit wei hadien wa da yoh laad ki wow pynsñiaw neiliang yong ki, daw chim ka sorkar yei rai kammon u leh ya ki.
Puræ leh: I yap u Cheristerfield toh iwa ye u yait lada ym pynemkaam bor palat ki pulit, chem ka takit
