Shillong: Ka United Democratic Party (UDP) neiliang u Secretary ka Party, u Jemino Mawthoh ynnin da yachem ko wa ki kyrtong yong ka na ri-loom Khasi Jaiñtia wow yaphyllu hei yatoh wa i rukom pynkhreh neibynta kani ka Election wow wan.
Hei yatoh wa ka Common Minimum Programme, u Mawthoh da ong u wa da em ka Committee ka wow pynkhreh ya ka Manifesto namo ka thong krehkaam yong ka party heiwa daw pait ya ki phang wa emkaam wow kreh ko.
Da ong u wa ka party ym slem de daw pyllait ko ya ka Common Minimum Programme ha ka General Council ka party ka wow man ha ka 15 tarik uni u bnai wow wan.
Heijooh i por da ong u wa daw em ka sorkar synrop ki seiñ saiñ hima na ri-loom (Regional Alliance) ha u 2018, heiwa da ong u wa ka la-ær da beh ko cha kani ka liang deiwa yooluti wa daw yoh hiwot ki ya katæ ka sorkar.
Hajrong ka la-ær wa ong wa u MLA ka Mawkynrew, u Remington Pyngrope wa ong wa daw mih u na ka party deiwa psiah cha ka National People’s Party (NPP), u Mawthoh da ong u wa yeini dang sylli da ka Disciplinary Committee ka UDP heiwa u Bindo Lanong, Paul Lyngdoh wa kiwi kiwi man ki kam ki dkhot.
Da ong u wa ini waroh daw che i kdar manda klam che u Pyngrope neibhah kamwa man katni wat hadooh kiwa pathai khubor leh ong ki wa daw yaleh u na kiwi ki party.
“Tangwa, ympu ye u ong katwa em katni neibhah neiliang yong oo ympu em u ong u iwon iwon hei yatoh wa ini,” da ong u Mawthoh.
Katkam i ong u, da ong u wa ymye u khang ya ki u psiah ki cha kiwi ki seiñ neibhah kani ka ri toh kawa laitlooid wei ka synchaar paidbah, tangwa ha u 2018 daw em ka sorkar wa phær katkam i angnood ki paidbah.
Discussion about this post