Jowai: Ka HYC da ong ko wa i dawa ya ka Article 371 ha ka jylla Meghalaya ym toh kawa thymme heiwa nadooh i por u Hoping wa kiwi ki bru rangbah ka jaitbru nachwa da yaklam ki chaphang ini, u Ardent leh da wanrah u da ka Resolution ha yung dorbar nachwa wei ka Ampareen katni leh da wanrah ko ya kani ka Resolution. Wei ym ye leh u mylliñ wa ka Federation of Khasi State da jooh klam ko ya ini na ki por cha ki por.
Ka seiñ da ong ko leh wa da em i klam wa lada wanrah yaka Article 371 ka Article 244 (2) wa ka Sixth Schedule daw dooh noh ko. Ini man ko kawa bakla neibhah wa da yoo ko wa ha ki jylla kam ka Mizoram, Assam ki em ki ka Article 371 wei ki em ki leh ya ki District Council wei ka Article 371 waka Sixth Schedule da ya krehkaam lang ki ha kini ki jylla. Nalor ini, ka Article 371 ha Nagaland da chna ya ki District Council ha Nagaland kiwa da jan ya sariem wa ki ADC ha Meghalaya. Chooh chooh ka seiñ da ong ko wa ym toh u sñiawthooh bakla wa ka Sixth Schedule ka klam ko ya i bor ki District Council wei ka Article 371 won ya ka bor kyrpang ka jylla.
Ka seiñ da ong ko leh wa em boon jait ki Article 371 wei ki yaphær ki kawi na kawi wei lada ki wan ha ka jylla yong i, toh u wan heitæ i dur wow pynskem ya ka Sixth Schedule wei wow e bor kyrpang leh ya ka jylla. Ka seiñ ka klam che ko wa ym pdiang ko ya kawon kawon hi eh ka Article 371 lada ka pyndooh pyndam ko ya ki District Council tangwa u pdiang ko lada ki wan ki wow krehkaam Lang.
I rukom man hi ha ka ri India hi waroh kawi wa ka synchaar man ko kayi kayi kawa i hap i wow pyrkhat yillu. I pyndooh ka BJP dei bor ya ka Article 35 (a) waka Article 370, i pyndooh noh ya ka jylla Jammu & Kashmir deiwa pynhiar ya ka cha ka Union territory, i dohyap ka BJP wow wanrah biang ya ka Citizenship Amendment Bill, ya ka Uniform Civil Code, ka Forest Amendment Act, i thmu pynkylla ya ki aiñ khyndaw, ka Anti-Conversion Law, i khang baam doh masi, i pynkylla noh ya i wym pynwit ka sorkar haka niam (Secularism), i phah klam Hindi yabor ya waroh, i thombor ya ka synchaar jylla (Federal Structure) wa i kyntait ka sorkar pyrdi wow pynlait (Exempt) ya ka Meghalaya na i krehkaam ka MMDR Act, ka Forest Conservation Act wa kiwi man ko kawa yang i ma ya ka jylla hi waroh kawi.
Kamtæ ka seiñ da sñiaw ko wa kam ka jylla yong i kawa khian paaid ha ka ri India kawa em du 3 ngut ki MP (2 ha Lok Sabha wa ka wi ha Rajya Sabha) iwa mut wa i da chah tam lypa i ha Parliament. Kamtæ yow lait na i ma ya ka jylla, kam ka seiñ da ong ko wa emkaam i wow em ka Article 371 wow pynkhlan chooh chooh ya ka Sixth Schedule.
Ka seiñ daw pynman ko yaka phyllu yumut hajrong ka Article 371 wa ka Sixth Schedule ha kini ki sngi wow wan, wei daw khut lang ya ki waheh wa sian nadooh ki Professor, ki Scholar, ki Lawyer, ki Politician, kiwa yahkhmat ki seiñbhalang wa kiwa yahkhmat ki dorbar tre ri wow chong pyrkhat bniah hajrong kani ka kaam.
Ini toh katkam wa pyntip u Robertjune Kharjahrin, President, HYC wa u Roykupar Synrem, General Secretary, HYC.
Discussion about this post