Ka seiñ kiwa ah dohsniang, ka Khasi Jaiñtia Pig Butcher Association da kyntu ko ya ka sorkar wow pynlait noh wow wanrah sniang na baar jylla, wei da rai ko leh wow pynku noh ya i dor i dohsniang na ka T. 360 cha ka T. 380 chi kilo.
Neiliang u Secretary ka KJPBA, u Andy Lyngdoh da ong u wa ka seiñ da chim ko ya ini i rai neibhah wa chem chitom wow pynbiang yei dawa dohsniang nadooh wa da khang wow wanrah ya ki sniang na baar jylla.
Da kyntu u leh ya ka sorkar wow tipmit noh ya kiwa khayi dohsniang ha ka jylla khnang wa ym poi de i eh i khoo hawa lai thied ya ki sniang na kiwi ki jylla deiwa dawa leh wow booh khyrdop wow pait bniah wa ki sniang kiwa wanrah cha ka jylla toh kiwa khlem iwon iwon i kjut.
Chooh chooh da ong u wa nadooh wa da khang wow wanrah sniang na baar jylla, da ktah i chiboon ya kiwa ah doh sniang neibhah wa i dor yaphær i wei da chem chitom leh wow pyndap yeiwa emkaam.
Da ong u leh wa hapoh ka jylla emkaam dohsniang kamwa 600 tylli ha ka chi sngi, tangwa nadooh wa khang wow wanrah sniang na baar, i dor leh da ku i wei katni du kamwa 200 tylli ki sniang wa ye u dai ha ka chi sngi.
Hawa kylli, ka seiñ da ong ko wa ka smat ko wow pynhiar ya i dor i doh lada ka sorkar elaad biang ko wow wanrah sniang na baar jylla.
