U President ka Meghalaya Pradesh Congress Committee uwa man leh u MP ka Shillong, u Vincent Pala da ong u wa ka Party daw lai ko katkam ka aiñ pyrchah ya ki MLA wa da mih napoh ka Party heiwa da dep yaklam ki wa ki muktiar hajrong ini wa jia.
U Pala da ong u wa kammon u ye ki u leh kamni hawa ki paidbah da e ki ya ka Vote cha ka Congress tangwa katni da chet kylla ki ya ki paidbah wei ki paidbah leh ym sñiawkmen ki yeini kamtæ daw yaleh pyrchah yeini da ka aiñ kamjooh da ki buit saiñhima.
U Vincent da ong u, “I mih u Dr. Mukul Sangma ym toh neidaw yong nga wei da man ko du wow e daw donhi wa toh neidaw yong nga,” da khana u leh, “U Mukul da dep kynjoh ktien u ya ka BJP tangwa ym bien ka BJP wow chim O wei ini toh chwa wow chimkti O kam u President, kamtæ u Mukul da em chwa u yei thmu wow mih na ka Party.”
Chooh chooh da ong u wa ki bru kiwa da jooh myllien wow em hi bor manda syndet syndet doh bor ki tæ pisa langaa ki khamtam hadien wa ka NPP da khlan chooh chooh ko ha ri-loom Garo wei ini man i iwi na ki daw.
Da khana u leh wa ka Trinamool Congress da kynjoh ktien ko ya oo kamjooh ya ka Ampareen hadien ka Election tangwa ki ym bien ki katwa u Mukul da ye u chah phon.
Hawa kylli won lada i mih u Mukul da pynstiñ ko ya ka Congress neidaw wa da em ki wym sñiawsuk de ya oo, u Vincent da ong u wa ini ymtoh iwa pynstiñ wei ymtoh iwa pynkhia yukit wei kam ka Party daw yieñ lang ko wow leh pyrchah neibhah ki dang em MLA dang em MDC ki wei ki wakreh ka Party toh kiwa dang khlan bha.
Da ong u leh wa ini i mih ki deiwa dang empor sa chi snem tam daw yarap ko wow pynkhreh ya ka Election wa daw wan yow thooh ya ki kyrtong wa dang thymme.
