Jowai: Ki Missionary Sister Mary Help of Christian (MSMHC) Mooralong Convent Jowai, daw lehkmen ki ya ka Silver Jubilee i man riewniam yong ka Sister Philisita Toppo, ha Mooralong Convent Jowai ha kani ka 28 tarik uni u bnai.
Ya ka Sister Phelisita Toppo da kha ha ka 23-11-1965. Ka man ko ka khon yong u Laurence Toppo wa ka Anna Miriam Lakra. Ki em ki 7 ngut chipayu, soo ngut ki chynrang wa le ngut ki kynthai. Ka Sister Philisita toh kawa ar na ki ynñiaw ngut chi payu.
Ki bei ki pa da phah skur ki ya ya ka nadooh dang khian ha St. Joseph Secondary School Hamirpur Sundergarh District Orissa (Odisha wa katni). Hadien wa dep ya ka puræ Secondary School, da phah ya ka cha Tinsukia Assam. Da chim ko ya ka smai riewniam kawa nyngkong (First Profession) ha ka 08-12-94 ha Tinsukia Assam wa ya ka smai riewniam kawa khaddooh wow man riewniam chi rta ha ka 08-12-2000 ha Little Flower Convent Hatigoan Guwahati.
Hadien i smai riewniam kawa khaddooh wow man riewniam chi rta da wan kreh ko ha Little Flower Malki Shillong ha u snem 1997 wa cha Ri-loom Jaiñtia ha u snem ha ka snem 2011 wow sah hadooh katni ha St. Theresa Convent Mooralong Jowai hadooh wa poi cha ka lehkmen Silver Jubilee namo i dap 25 snem i man riewniam yong ka ha kani ka 28 tarik uni u bnai, ha Mooralong Convent Jowai.
Ha chwa i lehburom ya ka Sister Philisita Toppo da ki khynnah ka Convent wa ki khynnah skur ka Tome Memorial Secondary School Mooralong, ka skur kawa pynlai da ki Sister, Missionary Sisters Mary Help of Christians, daw em ka knia Mass Iukharist ha i por 10 waje i step ka wow leh da u Phadar Hilarius Lamare, Vicar General ka Jowai Diocese.
Discussion about this post