U Waheh Chnong ka Tympang Iawmusiang Dorbar Chnong, u E. Shylla, hajrong i sahkut i jhep klem kit na Iawmusiang hadooh ynne ka sngi iwa da poi chi bnai i neh ini i jhep khlem khat khlem kit, hanla da booddien wa ki sahep ka Jowai Municipal Board wow kylli mynnu wow kit ya ini i jhep heiwa i jubab wa yoh toh wym pu yoh yei thaw noh-jhep.
Kamtæ ynne ka sngi kam ka rai wow pynyoo yei sñiawsih na ini i jia, da lai booh chi song chi song i jhep hakhmat ka yung krehkaam u DC tangwa i ym toh iwa pynchlur ya kiwi wow leh ya ini wei man ko du kam ka dak wow pyrchah donhi.
Da ong u leh wa kamwa da tip wa ka jylla Meghalaya daw kynjoh ko chei dap 50 snem tangwa tang i thaw noh-jhep leh ym biang ko heiwa nadooh u Prime Minister ka ri leh da wanrah u ya ka thong wow yoh yei khooid i jngiar lyngba ka Swachh Bharat Mission.
Kamtæ da chim ya ka rai wa lada ym ye wow kit ya ini jhep hapoh 9:00 waje i step ka 13 tarik, daw pynman ya ka yakhih deiwa chong hakhmat i jhep nadooh 11:00 waje hadooh 5:00 waje i janmiet deilang wa ki Placard wa ki Banner wei da khut lang leh ya waroh nadooh kiwa chong chnong, ki Synjuk Waheh Chnong, kiwa chongdai wa ki seiñ.
Heiyatoh won wa i lehkmen ya ka sngi laitlooid ka ri namo ka Independence Day, da pyntip wa daw leh hakhmat i jhep neidaw wa ka sorkar India leh da ong ko wa i lehkmen yei dap 75 snem i yoh laitlooid toh deiwa lehwarom ya ki jar jiar ki khlawait heiwa u khlawait yong i u Kiang Nangbah toh uwa da kha ha kini ki bynta wei da yap u leh deiwa chah pasi ha kani ka bynta ka Iawmusiang. Kamtæ kam chibynta wow lehkmen yei yoh laitlooid, daw hap leh hapyrdi i jhep lada ka sorkar ym ye ko wow wanrah yei khooid lane wow kit ya ini i jhep.
