Kiwa kitkaam ki ar chnong kiwa em ha khappood wa ka Assam wa kyntup ya ka Khanduli wa ka Lapangap da lai yachem ki ya u Deputy Commissioner ka West Jaiñtia Hills District, u Garod LSN Dykes ynne ka sngi heiwa da ekti ya ka dorkhat wow dawa phah sangeh ya i thmu ka Assam wow chna ya ka skurbah ha Khanduli (Pdeinsalait) ya kawa da pyrchah joor nadooh wa wan sylli ka Assam ya i thaw.
Katkam ka yutip wa da yoh, ki bru na ka sorkar Assam da wan pait biang ki ya i thaw ha kani ka 22 u Naiynru kiwa kynthup nadooh u Jogen Mohan uwa man u montri ka Assam wa u Rupsingh Teron u MLA ka West Karbi Anglong District kiwa da lai pait ya i thaw wa haap hapoh ka Elaka Shilliang Myntang wa ka Elaka Nongjngi.
U Pyrkhatbha Pyrphet uwa man u Chairman ka Lapangap Khanduli Border Area Joint Action Committee (LKBAJAC) da ong u wa lada ini i thmu ka sorkar Assam wow chna ya kani ka skurbah ha i thaw wa heh 5 Acre lai bait i, daw man i doohnong wa khroo ya ka Meghalaya khamtam ya ka chnong Khanduli wa Lapangap.
Chooh chooh da ong u wa khnang wow wanrah yei chongsuk da dawa wa ka sorkar Assam toh u chna ko ya kani ka skurbah hapoh u pood yong ka hi wei ymtoh chapoh Meghalaya neibhah lada chna bait ya ka ha Meghalaya da tikna daw mih i kajia wa i kulmar kamjooh leh i yaphær jaitbru.
Neiliang kini ki waheh da pyntip ki wa u DC ka District da kular u wa ym e laad ya ka Assam wow chna ya kani ka skurbah wa ya u sarok na Lapangap cha Khanduli.
Chooh chooh u DC da kyntu u ya kini ki waheh na ki ar chnong wow pynbiang noh wut-wut ya ki kot ki sla yong ki heiyatoh wa i thaw khnang wow yoh u yaklam wa ki bor District ka Assam wei wow ye u wanrah yei chongsuk ha kini ki chnong khappood.
