Ka Environment Coordination Committee (ECC) ka Elaka Sutnga daw mih paidbah ko haka 15 tarik uni u bnai (Dec) deiwa sdang na 1 Kilo yow lai cha yung krehkaam u Deputy Commissioner ha Khliehriat. Kani ka lai paidbah toh kawa da dep pynbait chwa wow pynman haka 25-11-22 tangwa da pyndam noh ya ka neidaw wa em iwa jia ha chnong Mukroh.
Kani ka lai paidbah toh neidaw wym bna ka sorkar wow bood yaka hukum ka National Green Tribunal, Kolkata heiyatoh wa ki karkhana Coke
Ka hukum toh kawa da pynmih nadooh ka 08-07-22 yow phah yaka sorkar wow daiñ kuna ya 31 tylli ki karkhana kiwa da chna khlem da yoh bor heiwa kani ka kuna dapoi ko T. 5.5 klur.
Ka NGT da phah ko leh yaka sorkar Meghalaya wow pynkhreh kammon wow pynman ya ki karkhana kiwa da yoh bor wow krehkaam chwa ka 23-12-20 yow sdang ki wow krehkaam katkam ki kyndon wa da pynbna da ka Meghalaya State Pollution Control Board (MSPCB).
Ka NGT da e por ko leh yaka sorkar 4 bnai wow leh yeini waroh iwa da kut por haka 8 tarik uni u bnai.
Neiliang ka ECC da pyntip ko leh wa da dep wow yachem wa u Symbood Montri Rangbah tangwa ym poi cheiwon cheiwon.
Hajrong ini i wym bna ka sorkar wow pyrkhat ya ki paidbah wow yoh ki wow im deiwa chait wa khiah, kamtæ da khut ya kiwa chong chong ka Elaka Sutnga wow mih paidbah yow chimbynta ha kani ka lai paidbah namo ka Rally ha ka 15-12-22.
