Hachwa wa ka seiñ Khooid Ya Ka Wah Myntdu u lai mihkhmat ko hei chong bichaar wa khaddooh ka NGT neibynta ka wah Myntdu ka wow man haka 22 tarik uni u bnai ha New Delhi, ynne ka sngi ha ka yalang yachem pyrkhat wa da khut pynman ka seiñ ha Yungwalieh ka Chiliangraij, Jowai, ka seiñ dap ko dei sñiawkmen neibhah kiwa wan chimbynta nadooh ki waheh chnong ki bru wa mihkhmat waphær waphær, kiwa yahkhmat ka Seiñraij Jowai, ki paidbah wa chong chnong kynthai wa chynrang hawa e buit e yumut, da e ki leh i kyrchaan wa pura hajrong ka thong wow yakhun dawa pynneh pynsah wei wow yada ya ka wah Myntdu.
Na kani ka yalang da mih leh i sur wow lai kyrpaad ya ka NGT Principal Bench wow phah embynta ya ka JHADC ha kani ka mukotduma khnang wa kam ka tre wa pait wa sumaar wa da pynkupbor da ka Sixth Schedule u chna ko ki aiñ ki kyndon wa yatoh waka wah Myntdu wei ini u kynthuplang leh ya kiwi won ki wah wa em hapoh u pood ka District Council.
Neitæ u phah khloh ya ki khyndaw u chyiap wa da noh wei pynkai neiwa chna sarok harood ka wah Myntdu.
U President ka seiñ Khooid Ya Ka Wah Myntdu, u Khroo Lamsalanki Pariat ong u hei lai luti wa san snem ka seiñ neibynta u kyrpaad ya ka sorkar jylla kamjooh ki bor District wow e yada ya ka wah Myntdu, tangwa yoh jubab pathan ki da u sarok wa da pynkreh harood ka wah Myntdu.
Kamtæ ha u snem 2024 ka seiñ da lai ujor syndon ko cha ka National Green Tribunal heiwa i bichaar hajrong kani ka mat da lai ko chakhmat wei i bichaar wa khaddooh ka NGT u man ko haka 22 tarik uni u bnai.
U K.L. Pariat da booh kyntu haroh u ya ki bor sorkar jylla wow chimkhia e yada ya ka wah Myntdu dei wow thung dieñ ha chi lynter i rood ka wah, ym wow e laad u mih ki yung ki sem harood wah Myntdu neibhah deiwa leh kamni u ye yada ya boon kiwa im ha ka nadooh ki dohum wa boonjait, ki jait thung wa rep kamjooh ki bru wa emkaam ya ka.
Da pynrap chooh chooh u deiwa ong, pdiang hi i ya u sarok tangwa u ktah won ya ki um ki wah deiwa noh taroi yei khyndaw u moo chapoh wah toh i wym ye de u pdiang.
Discussion about this post