U montri ka sorkar jylla na ka Party BJP uwa pait ya ka chnat i chait i khiah, u Alexander Laloo Hek ynne da ong u wa lada ki bor ka Party na khlieh kwah ki ya oo wow yahkhmat ya ka Party ha ka jylla da man u uwa smat wow chim ya ini i kaamram, neibhah katkam wa man katni da em i thmu wow pyndooh chuki noh ya u Ernest Mawrie kam u President yong ka.
Da ong u leh wa katkam wa man katni ympu tip yi wow chim ya i kyrdan kam u Party President ka BJP Meghalaya.
Chooh chooh da pynrap u deiwa ong wa dang em chiboon kiwa yahkhmat ka BJP ym du u AL Hek wei da ekti ha i rai yong ki heh ka Party ha ka ri neibynta ka BJP ha Meghalaya.
Heiyatoh wa mynnu u kyrriah ya u Mawrie, u Hek da ong u wa i pynhiar chuki ya oo chong i ha ka State Unit wa ka Central Leadership ka BJP.
Kam wow kdaw heini da em i tyrwa wow chimkti noh u Hek na u Mawrie kam u Party President ka BJP ha Meghalaya hadien wa mih boon i awri wa pyrchah ya u Mawrie na kiwa kreh ka Party.
