Shillong: Ka Confederation of Hynniewtrep Social Organisation (CoHSO) da pynsñiaw ko wa u pteiñ hi ko wow pyrchah ya i thmu pynman aiñ ya ka Citizenship Amendment Bill, 2016, wei ha i jooh i por da rai ko wow pynkhlan chooh chooh ya i dawa wow pynkrehkaam ya ka Inner Line Permit (ILP) ha ka jylla wow khanglaad na i yoh wow psiah ki bru na baar jylla.
Hawa yaklam wa kiwa pathai khubor, u Chairman ka CoHSO, u Robertjune Kharjahrin da ong u wa ki seiñbhalang hapoh ka CoHSO da chim ki ya ka rai wow pteiñ ya i pyrchah ya ka CAB, wei kamjooh leh wow pynkhlan chooh chooh ya i dawa wow pynkrehkaam ya ka ILP ha ka jylla.
Da pyntip u leh waka yalang wa pynman ha ka 4 tarik, ki seiñbhalang da chim ki leh ya ka rai wow thoh cha u montri rangbah ka jylla, u Conrad K Sangma ha ka 5 tarik uni u bnai wow dawa ya ka ILP wei kamjooh ya ki MLA ka Ri Khasi-Jaiñtia wow kyrchaan neibynta ya kani ka dawa.
U Kharjahrin da pyntip u leh ha ka sngi Chohthat kani ka tayaw ka CoHSO daw khut ko leh ya ka yalang yong waroh ki dorbar wa kynthup nadooh ki Dorbar Hima, ki Dolloi, kiwa yahkhmat chnong waroh, ki heh kur wei kamjooh ya ki seiñbhalang wow ya tylli ki hajrong i dawa ILP kamwa da rai ha ka Dorbar bah.
Chooh chooh da ong u wa lada ka sorkar jylla ym e dak ko hadooh ka sngi Chohthat wow pynkrehkaam ya ka ILP neiliang ka CoHSO ha ka tayaw wow wan daw pynbor ko ya ka wow leh da kiwi tawon ki kaam.
Discussion about this post