Hadien i jia wa chah dat ki 8 ngut kiwa khih mistri ha St. Xavier Girls Hostel ha ki damok kiwa ym tipmit iwa da wanrah leh yei khlaad uwi na ki ha ka ka chnong Umoid, South West Khasi Hills District, neiliang u Montri Rangbah ka jylla, u Conrad K Sangma da ong u wa ka aiñ daw leh ko deiwa khor ya kini ki damok.
U Conrad da ong u wa ka sorkar daw pyntikna ko wa kam ini ym jia de i neini chaphrang wei ki bor pulit dang thooh ki ya kini ki damok yow pynchitom ya ki.
Kam wow pynkynmoo heini, kini ki 8 ngut toh kiwa wan na baar jylla kiwa biang lut yaki kot ki sla khamtam na KHADC, da chah thombor ki ha ki damok ki wym tipmit.
Ki bor pynlai ka skur leh da rai ki wow sangeh ya i kreh wei wow sangeh noh leh wow pynman ya ki Class.
