Ha ka kyrwoh wa da phah da u SP ka West Jaiñtia Hills heiyatoh wa ka hukum wa pynmih da ka High Court ka Meghalaya ha ka 23 tarik uni u bnai kawa da ong, “Lada em iwon iwon i pyrchang da ki bru lane ki sieñ wow pynpoor ya ka yutip wa yahbakla wym krehkaam i tika hapyrdi ki bru ka jylla, ki bor sorkar ka jylla toh u leh ki wut wut yeiwa emkaam pyrchah ya kini ki bru lane ki seiñ katkam ka aiñ. Ki bor ka aiñ toh u pyntip ki leh cha ka yung bichaar manda em i jia kam ini”.
Kamtæ hajrong ini, da sneiñ ya ki bru paidbah wym toh u pynpoor ya ki yutip wa yahbakla heiyatoh wa i rukom krehkaam i tika hapyrdi ki bru ka District lyngba kiwon kiwon ki laad e yutip.
U SP da ong u wa kiwon kiwon ki bru lane ki seiñ kiwa pynpoor ya ki yutip lane ki khubor thok heiyatoh wa i tika, daw leh katkam ka aiñ ya kitu kiwa leh pyrchah.
