Jowai: U Deputy Commissioner, West Jaiñtia Hills da pynmih hukum u wow maham wei wow pynchitom joor ya kitu kiwa yah kari kiwa tyngkheiñ yaki kyndon (Protocol) wa da booh ka sorkar heiyatoh wow kit yaki bru.
U DC da ong u wa da yoh yutip u wa da em kiwa yah kari hadien wa li booh bru ki naki thaw wa da pynkhreh daka sorkar cha kiwa boon ki dong ki chnat, manda liwan ki, da kit bru ki jai, iwa tyngkheiñ yaki kyndon wa da booh ka sorkar wei ya kiwa leh ya ini daw pynchitom yaki katkam ka aiñ.
U DC da pyntip u leh wa da yoh yutip wa em ki Truck manda liwan ki na Assam da kit ki yaki bru kiwa ym em Register waka sorkar chapoh Meghalaya heiwa da em na kini ki bru wa kit ki da wan pyntip (Report) ki ha Hotel Highwinds Lakeside, Thadlaskein.
Ini leh man i iwa tyngkheiñ yaki kyndon wa da booh daka sorkar wei daw pynchitom ya kini kiwa yah kari hapoh ki kyndon ka aiñ.
