Ka mukotduma wa da yaleh hi da ka High Court ka Meghalaya heiyatoh wa i tih mooyong pyrchah ya ka aiñ hapoh ka jylla, da chong bichaar biang ya ka ynnin ka 9 tarik heiwa da wanrah leh ya ka bui (Interim Report) kawa 8 wa da leh da u (Rtd) Justice B.P. Katakey heiyatoh wa kammon bood ka sorkar ya ki kyndon wa da phah da ka Supreme Court deilang waka NGT wei kammon da leh yow dai lilam noh ya u mooyong wa da dep tih chwa.
Neiliang ka sorkar da khana ko ya iwa da leh ko yow bood ya ki kyndon khamtam heiyatoh wow dai lilam noh ya u mooyong wei da pyntikna wa ym em i tih mooyong hapoh ka jylla kamjooh i kit ya u mooyong.
Chooh chooh da pyntip wa da em boon kiwa da yaleh yow yoh License wow tih mooyong wei neiliang ka sorkar pyrdi da phah ko ya kini ki Application cha ka Expert Body yow bichaar.
Ka yung bichaar da ong ko wa ini da che kdar wa ym em wa da yoh bor wow tih mooyong hapoh ka jylla ha kiwon kiwon ki rukom, kamtæ toh u pynchitom ya kitu ki tre Truck wa kamjooh ka seiñ yong ki lada kit ki ya u mooyong wa dang dep tih thymme.
Heiyatoh wa i dai lilam ya u mooyong, ka sorkar da ong ko wa da lai bha i kaam chakhmat wei daw pyndep katkam i por wa da booh da ka yung bichaar.
Ya kani ka mukotduma daw chong bichaar biang ha ka 07-12-22.
