Shillong: U montri rangbah ka jylla, u Conrad K Sangma da ong u wa ka sorkar jylla daw pynemkaam ko da ki thaw sorkar ki wym emkaam wow thied yow pynduna yei lutsan neibynta ka National Games ka wa daw man ha u snem 2022 ha ka jylla.
Hajrong ini i kaam, ynne ka sngi ka High Powered Committee (HPC) wa khlieh da u montri rangbah da chong yalang ki wow bichaar ya ki thaw sorkar kiwa ye u pynemkaam neibynta ka National Games wei ka yalang da rai ko wow yaleh bait wow pynyoh da ki thaw sorkar khnang wow duna i lut na ka muna poisa sorkar.
Da ong u wa ka sorkar kwah ko wow pynsmat ya ini i pynkhreh neibynta ka National Games wei katni da lai ko chaaid chaaid cha khmat. “Ka sorkar da tipmit ko ya ki kattu katni ki thaw ka sorkar hapoh ka nongbah Shillong wow pynemkaam neibynta wow chna ya ki Stadium wa ki Game Village,” da ong u Conrad.
Katkam ka khubor wa da yoh, ka HPC da pyntip ko wa kamwa 200 Acre ki thaw ka sorkar na ki chnat sorkar waphær waphær ha ka thaaiñ Mawdiangdiang neibynta wow pynemkaam ha ka National Games, wei ini kynthup ki ya ki thaw yong ka Urban Affairs iwa 75 Acre, yong ka Social Welfare iwa 50 Acre wa na ka chnat Tourism iwa 40 Acre.
Ini i rai ka HPC toh hadien wa i thooh thaw wow thied thaw neibynta ka National Games, tangwa da chem wa du wow thied thaw, i dor wa da booh da kiwa pynlai chnong poi i nadooh T. 80 Klur hadooh T. 90 Klur du wow thied thaw.
Lada ka sorkar pynemkaam ko ya kini ki thaw wa da em chwa ko daw lait ko na i dooh nong wei kam ki thaw sorkar daw ye u pynemkaam biang ya ki hadien ka National Games.
Also Read: Hadooh T. 300 klur u e ka sorkar pyrdi ya ka jylla neibynta ka National Game 2022
Discussion about this post