Daw pynkhai im biang ya ka Pastieh Blai Ryngkaw ki khon ka Raij Jowai 

Ka Dorbar Niam man ko ka chnat krehkaam kawa kongsan bha ha ki khon ka Niamtre kawa pynneh wow pyrkhat ya ki kaam niam hapoh ka Raij Jowai, wei ynne ka 26 tarik ka Dorbar Niam ka Seiñraij Jowai da pynman ko ya ka Dorbar ki Kñi wa Ka Kchu Ka Siang ha Madan Kñia Pyrthai, Dulong Poh-Hali.

U Shape Paswet uwa man u Kñi ka Kur Paswet da e u ya ka phang wa ong “I Chwar U Pa Pyrkhat Wa Pynskem Ya Ki Kñi Phra Kur Phra Kmai” heiwa da khana u ya ka yutang kammon wa da seiñ ya ka chnong Jowai. 

Da khana u leh kammon wa sdang leh ya ka lehniam Behdieñkhlam wei kammon ki Kur yoh ki ka bhah ha ki kaam niam hapoh ka Raij Jowai.

U General Secretary ka Seiñraij, u Arwotki Sumer da klam u hajrong ka phang “I Dor I Pyrtuid Niamtre” uwa da batai yei man kyntang ka Niamtre ha ka jaitbru yong i. 

Related posts

Daw pynman ya ka dorbar ka Seiñ Kur Shadappasah

December 23, 2024

Hapyrdi i phooh i phieñ da pynkut ya ka Dorbar Niamtre ki khon ka Ri 12 Dolloi 30 Syiem ha Jowai

December 22, 2024

Da batai u leh ya ki yurim wa ka Niamtre yieñ wei sneiñ ko ya ki khon yong ka nadooh wa dang im hadooh wa khlaad neini na sla khyndaw pyrthai wei kammon ka Niamtre yah ko wa ymtoh u e kur e jait cha u chynrang.

Neiliang u President ka Seiñraij Jowai, u Hercules Toi da klam u hajrong ka phang “Ki Kñi Lyngba Ki Chnong Ki Raij Wa Ku Ka Niam Ka Rukom” heiwa da khana u ya i kaamram yong ki kñi wow pyndep ya ka niam ha jar jiar ki yung, ki chnong wa ki Raij.

Da batai u wa u Kñi toh u chakri u Blai uwa pyndep ya ka niam ka rukom ha yung nadooh i kñia, i bia wa ki kaam niam hawa yap wei man u leh kam u Pa ha yung ka kurim.

Ha kani ka dorbar da wan sakhi wei da pynkup burom leh ya ki Dolloi na kylleiñ ki Elaka ka Ri-loom Jaiñtia kiwa kynthup ya u Dolloi na Elaka Nangbah, Elaka Raliang, Elaka Shangpung, Elaka Mynso, Elaka Darrang, Elaka Nartiang, Elaka Nongtalang wa ka Elaka Nongjngi.

Chooh chooh ha kani ka Dorbar da pynkup burom leh ya ki Kñi ki Phra Kur Phra Kmai kiwa em hapoh ka Raij Jowai kiwa em bynta ha ki kaam niam hapoh ka Raij.

U Dolloi ka Elaka Jowai, u Puramon Kynjing da pyntip u wa ka Dorbar Niam ka Raij Jowai da rai ko leh wow pynkhai im biang ya ka Pastieh Blai Ryngkaw wei kani ka Pastieh u pymman na Loom Mookhai wei u pynkut ya ka ha Madan Blai Ryngkaw (Tpep Pale) Jowai wei nachwa jooh pynman ya ka ar-le sien ha ka chi rta u Dolloi.

Ya ka Dorbar ynne da pynlai da u Pator ka Elaka Jowai, u Raymond Nartiang wei u S. Siangbood u Langdoh ka Raij Jowai da e u ya ki kyntien pdiang burom.