Ka sorkar jylla ka Nagaland ynnin ka sngi, neidaw wa boon kiwa chah ktah ha ka khlam COVID-19 da rai noh ko wow pynkrehkaam da ka Lockdown wa chi tayaw ka wow sdang nadooh ka 14 tarik hadooh ka 21 tarik uni u bnai.
Ya ini i rai da chim da ka High Powered Committee on Covid-19 ka jylla kawa da chong yalang ynnin heiwa da rai wow pynkrehkaam noh ya kani ka Lockdown wa chi tayaw nadooh ka 6:00 i janmiet ka 14 tarik hadooh ka 21 tarik uni u bnai.
Chwa ini neiliang ka sorkar jylla da pynkrehkaam ko ya ki kyndon wow khoom u kdoh heiwa da rai wow khang ya ki skur wa ki thaw puræ, ki thaw paidbah, ki yalang paidbah wa kiwi kiwi.
Katkam wa man katni hapoh ka jylla da em 2,884 ngut kiwa dang chah ktah ha ka khlam heiwa du ynnin ka sngi da em 133 ngut kiwa dang yoh wa 10 ngut kiwa dang khlaad kiwa da kynjoh waroh cha ka 150 ngut.
