I pynduna yei jhep, i yabhah yei jhep, i pynkylla sboh yei jhep da man ki kiwa da yaklam bha katni khamtam hawa da sdang yoo hapoh ka jylla wa da chitom wow yoh thaw noh jhep wei i pynkreh ya ki thaw noh jhep wa pura katkam ka juk wa katni toh iwa dang chimpor, kamtæ da emkaam ya uwi pa uwi nadooh kiwa chong chnong kamjooh kiwa chongdai cha ki yaw ki haat wow em ki yei bahkhlieh yei jhep wa pynmih.
Hajrong ini, ha Khliehriat dadep wow pyndait yaka kor wow pynkylla yei jhep cha i sboh namo ka Organic Waste Converter kawa da booh ha yaw Khliehriat wei i thmu toh wow pynlang pynlum yei jhep kam ki jhoor, i doh kamjooh kiwi kiwa ye u pyut deiwa yabhah chwa pyn da kiwa chongdai ka yaw dep te li booh ya ini i jhep cha i thaw wa em kani ka kor.
Yow pynkrehkaam ya kani ka kor da booh ya uwi u bru uwa daw yabhah biang yei jhep wa da wan booh ki bru heiwa ki jhep wa rap heh wa kiwa jwat daw tylliat chwa da ka kor chwa u ye u pynkylla sboh ki.
Hadien wa dep u tylliat biang sa chisien yei jhep, da thap hapoh ka kor wa pynkylla sboh yei jhep deiwa khlehlang wa u Sanitreat Powder yow pynwiar yei sma, u Bioculum yow smat pynpyut wa i ait kharat yow taan yaka um wei yei iwa mih na ini da pynlang hapoh ki kriah wa da em hapoh ka kor kiwa da sai won yow booh 15 sngi (Curing Period) yow kylla jhep ki wei ha kini ki sngi daw kynjrait um yow pyntikna wa man sngem yow lait u raw yow yoh yei sboh wa miat.
Kani ka kor toh kawa da yoh napoh ka District Mineral Fund wei dadep wow pyndait ka nadooh u Naichiphaw 2021 tangwa neidaw wym pu em wan pyndait bordiñ ym ye wow pynkrehkaam ka heiwa u DC da ong u wa daw pyntikna wa hapoh 14 sngi u leh yeini yow ye u pynduna noh yei jhep wa mih na ki jhoor kamjooh ki doh ha ka yaw Khliehriat.
I bor kani ka kor hawa pyrchang ya ka u tylliat u pynkylla sboh man i 100 Kg chi sngi. Ya ini i sboh daw dai yow pynmih poisa u pynkrehkaam ya kani ka kor heiwa yei sboh daw song hapoh churia.
