Jowai: Ka Khasi Students’ Union (KSU) Narpuh Circle da pyntip ko wa daw saam ko ya ka “7th Mait Shaphrang Academic Award 2018” ha ka 10 tarik uni u bnai ha ka yalang wow pynman ha Government LP School Sonapyrdi ha i por 11:30 i sngi.
Ya kani ka khusnaam u saam cha kitu kiwa puræ ka thaaiñ Narpuh kiwa da leh bha ha ka SSLC, HSSLC wa kiwa pyndep Graduate yong u snem 2018.
Ya kitu kiwa dadep pynpoi ya ki Mark Sheet ha kini ki tayaw wa dadep wow sñiawbha ki u wan mih ha katai ka tarik ha i por wa da booh yow yoh u pdiang ya ka khusnaam yong ki.
Ha kani ka jooh ka sngi, daw em leh ka pynsñiawthooh paidbah hajrong ka phang “Skill Development Program” heiwa daw wan ki bru wa chemphang (Resource Person) na ka yung krehkaam ka District Commerce & Industrial Centre East Jaiñtia Hills District.
Ka seiñ da khut sñiawbha ko ya kitu ki wym ye de u pteiñ ya ka puræ puthi neidaw ka dooh ka duk wei kamjooh ya kitu kiwa da pyndep ya ki puræ puthi waphær waphær, ki wym yoh kreh wow wan sñiaw ki ya kani ka pynsñiawthooh paidbah yow yoh myntoi ki.
Ha kani ka jooh ka sngi ka Khasi Students’ Union Sonapyrdi Unit daw lehkmen ya lyngkhooh snem wa 10 yong ka wei daw pynskem leh ya kiwa kitkaam wa thymme ka KSU Narpuh Circle yong ka samoi krehkaam 2018-2021.
Discussion about this post