Ka Music Video yong i sur rwai wa pyrtuid ‘Maia Wa Skem’ daw pynlait paidbah ha ka 12 tarik uni u bnai wa da ak da u Robert Dkhar waka Rifani Rymbai wei da rwai da u Kiwan Nongtdu waka Meba Kympat.
Ya kani ka Music Video daw pynlait ha ka YouTube Channel wa pyrtuid JaintiaFun heipor 5:00 waje i janmiet.
Neiliang u Robert Dkhar, uwa naka chnong Byndihati, East Jaiñtia Hills da paan u yei kyrchaan na phi ki paidbah wow pait ya ini i Video wei wow pynpoor lang namo u Share ya ini i Music Video deiwa ong wa ini toh i sien nyngkong i Video wa ak u wei i kyrchaan yong phi daw yarap ko ya ki wow ku ki chakhmat.
Ka Rifani Rymbai, kawa na Byndihati, East Jaiñtia Hills da kyrpaad ko leh yei kyrchaan yong phi ki paidbah wei ka leh man i sien wa nyngkong wa ak ko ha ki Music Video kamtæ da ong ko wa i pait phi ya ini i Video daw man ko iwa e mynsien bha ya ki.
Neiliang u Director ka Video, u Paimon Dkhar da ong u wa ini i sur toh neibynta ki khynroo khyllood yow man ko ka nongmuna wow em i maia wa skem yow man kiwa kmen hei thah khih thaw kreh wa ha yung ha sem.
Yei tem i put ini i sur da pyntoh pyntne ha Recording Studio u Diamond Lalooh heiwa ya ka Mixing wa Mastering da leh da ka DMBRIX.
