Ka Women’s Wing ka Environment Coordination Committee Elaka Sutnga ha ka yalang wa da pynman ha ka chnong Lamyrsiang, EJH ha ka 10 tarik uni u bnai da iwi i yumut da khut da wer ko ya ki khon khyllood wa ki manbei yong ka thaaiñ Elaka Sutnga wa ya waroh ki kynthai kiwa em hapoh ka District yong ka East Jaiñtia Hills kiwa na jan na jngai wow ya mih paidbah ki ha ka lai paidbah namo ka Rally kawa daw man ha ka 13-09-2021 wow pyrchah yei leh mutlop ka sorkar ya ka sur yong ki paidbah hajrong i chna ya ki kharkhana Coke hapoh yong ka Elaka Sutnga.
Kani ka Rally toh kawa daw sdang nadooh 9:00 waje i step na madan bol ka chnong Moopala deiwa lai paiadbah nadooh na 1 Kilo chadooh ka yung krehkaam u DC, Khliehriat hadooh 1:00 waje i sngi katkam wa da yoh bor na u DC kamtæ ka ECC da khut sñiawbha ko ya waroh ki chnong kiwa chah ktah ha i tdem kini ki karkhana Coke wow ya mih paidbah ki.
Ha ka yalang wa pynman ynne ka sngi da ka ECC, da pynsñiaw yei chrai wa wot hapyrdi i pyrchah ki paidbah, dang e ya ka Consent To Operate (CTO) sa cha ki 4 tylli ki karkhana Coke. Da em leh 31 tylli kini ki karkhana wa paan bor yow sdang u chna deiwa paan ya ka Consent To Establish (CTE) tangwa kini toh kiwa da dep chna chwa.
Ka ECC da pynsñiaw ko leh yei sñiawdiaw ya ka JHADC ka wym ap yei kyrpaad wei ujor kiwa chong chnong.
Ha kani ka yalang wa pynman da emlang ki waheh chnong deilang wa ki bru rangbah ka thaaiñ Elaka Sutnga wa kamjooh kiwa mihkhmat na ka chnong Narwan wei ya ka yalang da chongknor da u D.H. Malang.
Kamtæ ka Women’s Wing da yieñ ko ha ka yurim wa skem hadooh katni wow pyndooh pyndam ya kini ki karkhana Coke.
