Shillong: U montri rangbah ka jylla, u Conrad Sangma, ynne chirup wa u Prof. Dinabandhu Sahoo, Director of Institute of Bioresources and Sustainable Development (IBSD), da khut sñiawbha ki ya kiwa chong chnong ka ri India wa kiwa na baar ri wow wan cha Shillong, Meghalaya wow sakhi ya ka India International Cherry Blossom Festival 2018.
Kani ka lympung daw pynman ya ka nadooh ka 14-17 Khonchonglad (Nov) 2018.
Hawa yaklam wa kiwa pathai khubor ha Press Club of India, New Delhi, da ong wa ye wow wan sakhi yei phooh ki Cherry Blossom ha Shillong khamtam ha Nan Ward’s Lake.
U Sahoo da ong u wa ka Cherry Blossom Festival wanrah ko chiboon i yoh khih yoh kreh neibhah ha ki sor ki ri kam ka Japan, New Zealand wa Korea da ki phaw lak ngut wa wan sakhi ya ki Cherry Blossom.
Da ong u wa du ha Washington DC, kani ka jooh ka lympung wanrah ko palat 1.5 million ngut kiwa wan uiñke suwari wa palat $400 million ka poisa man la u snem. Da ong u leh wa ka India International Cherry Blossom Festival 2017, kawa da leh kam chibynta yong ka International Year of Sustainable Tourism for Development da wanrah ko palat chi lak ngut ki bru iwa da pynku yei yoh i kot palat 300%.
U Conrad da yaroh u yeini iwa da sdang ka IBSD deiwa pynrap wa wow pynphooh ya kani ka lympung emkaam wow yakrehlang chirup wa ka sorkar ka ri Japan lyngba ka Embassy of Japan ha India.
Ha ka India International Cherry Blossom Festival 2018 daw em chiboon ki kaam pynwyrngia ki wow pynchohbiej ya kiwa wanke kam ki fashion show, rock concert, beauty pageant, Golf tournament wa kiwi kiwi.
Ha kani ka kynti daw em leh ka Japanese Food Pavilion hei yakrehlang wa ka Embassy of Japan ha India.
Discussion about this post