Shillong: U Dr. Mukul M. Sangma, wa u Prof. Dinabandhu Sahoo uwa man leh kam u Director of Institute of Bio-resources and Sustainable Development (IBSD), da khut sñiawbha ki ya ki paidbah ka ri kamjooh kiwa na baar ri wow wan cha Shillong, Meghalaya yow leh sñiawbha ya ka India International Cherry Blossom Festival.
Kani ka Autumn Cherry Blossom Festival, kawa man leh du kam ka ha kylleiñ ka pyrthai daw pynman ya ka ha ka 8-11 Khonchonglad (November) 2017.
Hawa e i klam wa kiwa pathai khubor ha Press Club of India, New Delhi, da ong kiw wa lada kwah ki wow sakhi ya ka Cherry Blossom Festival, ym emkaam de wow lai cha Japan namo USA neibhah kattu daw pynman noh ya kani ka lehkmen Cherry Blossom ha Shillong, heiwa kini ki syntu phooh ki ha u Khonchonglad tymbud u sarok wa em ka nan Ward’s Lake.
Kani ka Cherry Blossom Festival, kawa tip leh kam ka Sakura ha Japan, heiwa ki paidbah pynlut ki da ki hajar dollar wow lai sakhi ya kini ki dieñ heipor wa phooh syntu ki ha Japan wa ha USA ha u Wisu (March) man u snem.
Katni ya kani ka Cherry Blossom Festival da yarap ko leh wow wanrah khih ya kiwa boon ki bru neibhah wa du ha Washington DC samen kani ka lehkmen wanrah ko palat 1.5 million ngut ki bru iwa wanrah yei yoh nong hadooh $400 Million man u snem.
U Prof. Dinabandhu Sahoo, Director of Institute of Bioresources and Sustainable Development, da pachat yumut u wow sdang ya kam kani ka Cherry Blossom Festival deiwa yakrehlang wa ka sorkar jylla ha u snem 2015. Kamtæ haka 14 Naisan 2015 da thung ya kini ki dieñ da u Dr. Mukul Sangma chirup wa u Prof Dinabandhu Sahoo ha Ward’s Lake, Shillong.
Ha uni u snem wa dadep da pynman ya ka Cherry Blossom Festival, wa nyngkong dooh hapoh ka ri India ha Shillong , Meghalaya nadooh ka 14-17 Khonchonglad November 2016, ya kawa da pynman da ka sorkar jylla hei yakrehlang wa ka Institute of Bio-resources & Sustainable Development (IBSD), kawa man leh ka tnat krehkaam yong ka Department of Biotechnology, Govt of India. Ha kani ka lehkmen da poi da ki spah ngut kiwa uiñke suwari iwa da wanrah chiboon i myntoi ya ka jylla.
Ha uni u snem daw em boon ki kaam pynwyrngia ya ki paidbah nadooh wow pynche ya kini ki dieñ, ki rwai ki tem, ki yakop miat kynthai, ki yakop chon dur, ki yakop khana parom wa kiwi kiwi.
Discussion about this post