Ka sorkar Meghalaya da pynbna ko wa daw pynman biang ko haka sien wa le yaka Winter Tales ha uni u bnai hapoh ka Meghalayan Age Limited wow pynlai da ka Dak_ti Craft kawa le sngi nadooh ka 19 hadooh ka 21 tarik ha Ward’s Lake.
Kani ka Winter Tales man ko leh kam ka yaaw ka haat ya kiwa seiñ khih, kiwa chna ya ki tiar ki tar wow pynyoo rong wei wow dai ya ki mar yong ki kamjooh leh neibynta kitu wa em sap hei tem i put, i chet baam wa kiwi de.
Kani man ko leh kam chibynta wow pynchlur ya ki jait kreh ki wym pynmih ki jakhlia wa ktah yaka rymaw.
Ha ki snem wa da lai, ha kani ka tamasa da ye wow sai ya kiwa boon ki sap wa rieh hapoh ka jylla ki wym em jooh em yow u yoo ka pythai nadooh kiwa soor that, ki chna tiar pynriam, kiwa tem sur, kiwa dro dur, ki jait baam wa chet, kiwa thoh kot kiwa da wanpoi ha kani ka Winter Tales.
Da pyntikna leh wa kini kiwa yoh wow embynta ha kani ka Winter Tales toh du kiwa napoh ka Meghalaya donhi.
Ki Ticket ye wow thied naka website www.wintertales.in wei ka poisa wa mih daw e cha ki thaw ri khonswet wa ki thaw kiwa ri ya kiwa da tymmen.
Ki khynnah wa hapoh 10 snem daw yoh ki wow psiah dei mynkna wei waroh ka yutip wa bniah ye ki wow yoh naka website wa da kdaw haneiñ.
