Khliehriat : Ka Dong Pyrdi FC da man ko ka Dong kawa nyngkong dooh kawa rah yei naamjop yong ka “1st Umlyngsha Inter-Dong Football League 2016” kawa pynman da ka Umlyngsha Youth Society And Sports Club (UYSSC), Umlyngsha, Elaka Lakadong, East Jaiñtia Hills District.
Hadien wa da jop ko pyrchah ya ka Dong Main Road FC ha ka Yakhun Final ynnin ka sngi 20 tarik ha madan Umlyngsha heipor 2:30 Nohchariñ sngi.
Ha ka yakhun da man sakhiat ko kawa yoosuk bha heiwa ka Dong MR FC da yalehke bha ko ha ka kylla step hawa da pyrchang ko u thap kool tangwa ym em ye ko u thep ia ki, tæ neiliang ka Dong Pyradi leh da pyrchang ko kat wa ye u pynkhih ya ka jaar kool tangwa hawa kut ka kylla step ym em wa ye u thap.
Hawa pteiñ ha ka kylla miet pynar kini ki Dong da pyrchang ki u yakhun neibynta wow yoh u rah yei naamjop wei hawa khaddooh ka Dong Pyrdi da man ko kawa jop ya kani ka League hadien wa da yoh ko u thap ya ki kool ha chwa u kut ka yakhun katae ha ka minit kawa 60 lyngba u Sambor Rymbai wa ha ka minit kawa 67 lyngba u Ajoy Talang.
Ya ki prize da saam da u Waheh Chnong Umlyngsha u ma Mewell Syrti cha kiwa jop wa cha kiwa chah rem katwa ya ki personal prize kam u Best Player wa u Topscore da rah da u Toni Talang na ka Dong Main Road FC katwa ya u Best Goalkeeper da rah da u Hamboy Talang na ka Dong Pyrdi.
Hadien wa dakut ka yakhun Final yong ka Inter Dong da em ka yalang wa tbian yong ka Club heiwa ha kani ka yalang da chim ya ka rai wow pynman ya ka Knock Out Footbal Tournament 2016 ha uni bnai wow wan heiwa ha kani Tournament neiliang ka Club ryngkat wa ki waheh wa ki khynroo da rai wow e naam e burom ha u Woh Kiang Nangbah kam chibynta wow kynmoo ya ki kaam wa da leh da uni u khlawait ka Ri Jaiñtia katwa kamtæ da tip leh ya kani ka lympung kam ka ” Unlyngsha 1st Woh Kiang Nangbah Memorial Footbal Tournament 2016″.
Neiliang ka club da khut ko ya ki Team/Dong/Chnong wa ya ki Team samen wow wan ya chim bynta ha kani ka Tournament heiwa daw pynyaleh heidur ka 8-Aside (Phra ngut chiliang ) neibhah ka club da pynkhreh haroh ya ki prize kam ya kawa jop wa ya ka wa rem da man kamni:
1.Winner – T. 20,000/-
2.Runner up- T. 10,000/-
3.Enter fee- T. 1500/-
4. Player Registration- T. 10/- samen
5.Team -1st Round = 24
Wow tip bniah ye ki u phone ha kini ki no : 8794916446 / 8014432379 President / Secretary UYSSC.
Discussion about this post