Ka Seiñ Raij Mukhla kamwa jooh pyman man-u-snem ya ka Chaad Sukra, myntu u snem leh daw pynman ya ka Chaad Sukra yong ka ha ka 02-04-2021 ha Madan Ryngkaw Slot Masi Mukhla Nongrim, West Jaiñtia Hills District.
I yumut kani ka Chaad Sukra man ko kammon wow pynneh pynsah ya ka Dustur ka Riti ka Niam ka Rukom wa da yoh ya i hikai nadooh ki longchwa manshwa, wei ya kani ka Chaad Sukra ka Seiñ Raij Mukhla da pynman ha man-u-snem hadien wa ka Seiñ Raij Mukhla da dep ko wow pyndep ya ka Lehniam Knia ya ka Syiem Khlam wa u Ram Shyllong kiwa man ki Blai kiwa ri wei sumaar ya ki khon ka seiñ yow lait na i kjut i chitom wa ka yap ka sa, wei kamjooh leh wow ya lehkmen leh sñiawbha wa chwa wow hiar rep ya u khoo u kba u symbe u phniang cha ki pynthor wei wow e ngooh leh ya ka Bei Rymaw.
Kamtæ ka Seiñ Raij Mukhla da khut da wer ko ya ki Seiñ Raij waphær waphær wow sñiawbha wow wan ya chimbynta lang ha katai ka sngi khnang wa kani ka Chaad Sukra u man ko kawa phooh wa phieñ.
Ini toh katkam wa pynlait khubor u S. Sari, Auditor Sein Raij Mukhla.
