Ka Thadlaskein Sports Association (TSA) hadien wa ka Meghalaya Football Association (MFA) da pyndam ko yei chah Suspend ya ka Association. Neiliang kiwa kitkaam wa thymme yong ka da yachong pyrkhat kaam ki ha ka 1 tarik uni u bnai wei da iwi i sur da chim ka rai wow pynman ya ka Football Tournament kawa tip kam ka Thadlaskein Football League 2024.
Ya kani ka Tournament u sdang noh ya ka ha ka tayaaw wa nyngkong yong u bnai December 2024 ha madan Mini Stadium Wahiajer wa ha Wahiajer Multipurpose Sports Complex.
Ka tarik wa khaddooh u pdiang ya ki Team wa kwah u chimbynta toh ha ka 23-11-24 deilang waka bai yaleh namo ka Entry Fee.
I thmu yong kani ka Tournament toh yow pynku yei kaam Sports ha kani ka thaaiñ kamjooh leh yow sai yow pynmih biang ya ki khon khynroo kani ka thaaiñ kiwa em ka sap ka phong wow yalehbol neibhah kani ka thaaiñ toh kawa jooh sai jooh pynmih ya kiwa yalehke wa mihkhmat ya ka District hadooh ka jylla leh ha ki por wa da lai.
Ka Entry Fee kani ka Tournament man ko Rs. 1500 wei kiwa yoh yei naam Champion daw yoh ki Rs. 1 lak, kiwa rem Final u yoh ki Rs. 50,000 katwa kiwa yoh wa le won u yoh ki Rs. 25,000.
Ka Champion kani ka Tournament u yoh ko leh u chimbynta haka Meghalaya State League 2025.
Kamtæ neiliang yong ka TSA da khut da wer ko ya ki chnong ki Club kiwa haap hapoh u pood u ang ka Association wow ya wan chimbynta phi ha kani ka Tournament dei mynsien u pynkulang ya ki kaam Sports ha kani ka thaaiñ.
Yow tip bniah ye phi wow Phone ha u Chaphrang Laloo, Football Secretary (9856998601).
Discussion about this post