Ka CEC ka AJMDMWU kawa da pynman ynne ka sngi ha Yungwalieh ka Tpep Pale, Jowai, da chim ki da ka rai wa haka 31 tarik yong uni u bnai daw pynman ki ya ka dorbar bah yong kiwa chet ja-sngi ha skur (Cook cum Helper) heiwa waroh kini ha jylla u yawan lang ki cha kani ka yalang kiwa em hadooh 18,776 ngut.
Kani ka dorbar bah toh yow kyrpaad joor ya u Montri Rangbah ka jylla, u Conrad K Sangma wa ki Montri yow monjur ki u pynkrehkaam noh ki ya i tyrwa ka chnat Puræ Puthi ka jylla wow pynku ya ka poisa na ka T.100 chi bnai cha ka T. 2000 chi bnai kawa su ko kaam i e sñiawbha namo ka Honorarium kam i bhah ka sorkar jylla cha waroh kiwa chet ja-sngi ka jylla wei wow pynlait leh yei su wa dang sah yong Naiynñiaw hadooh u Naichiphaw heiwa uni u bnai leh da kut noh u.
Kamtæ da kyrpaad leh ya u Prime Minister, Narendra Modi wow yarap u leh wow pynku noh ya ka poisa wa e sñiawbha na ka bhah ka sorkar India cha kiwa chet ja-sngi ka ri India khnang wa i krehkaam kani ka PM-POSHAN u nang khlan wei u nang myntoi ki khynnah skur ha ka ri waroh kawi.
Kamjooh leh da kyrpaad joor ya ka sorkar wow su noh ko ya i bhah u bnai Kmaichonglad (Dec) khnang wa kiwa chet Mid Day Meal u yoh ki u thied wei wow pynemkaam ha ka Christmas kamjooh leh i bhah yong u Duyatra (Jan) khnang wa kiwa chet u yoh ki u thied Uniform skur, ki kot kamjooh leh kiwi tawon ki emkaam yong ki kam ka tadong Gas (LPG) wei wow pynpoi umkor ha kamra chet.
