Ki 4 tylli ki seiñbhalang kiwa kynthup yaka EJNC, JSM, HYC wa HANM hei yachem lang yong ki ha ka 11 tarik uni u bnai, da iwi i yumut da rai ki wow pynman noh da ka lai paidbah namo ka Rally kawa heh bha ha Jowai ha ka 18 tarik.
Ya kani u sdang na madan Mihmyntdu heipor 12:00 waje pyrdi sngi chadooh cha Iawmusiang wei daw uiñ biang cha madan Mihmyntdu wei hadien kani ka Rally daw em leh ka yalang paidbah ha katai ka jooh ka madan.
Ya kani ka Rally da pynman hajrong ka yurim wow pynbor ya ka sorkar MDA wow pynmankaam noh ya ki 9 tylli ki phang dawa ki 5 seiñ kiwa haap hapoh ka ‘Save Hynñiewtrep Mission’.
Neiliang kiwa yahkhmat ka seiñ da khut da wer ki ya kiwa chong chnong ka Ri-loom Jaiñtia kiwa em i sñiawkha ya kini ki dawa wow embynta lang ki ha katai ka sngi.
