Kam chibynta i yakhih hapoh ka ri wa pynman da ka National Coordination Committee of Electricity Employees and Engineers (NCCOEEE) kam i dak wow pyrchah ya ka Electricity (Amendment) Bill 2021 wa da wanrah da ka sorkar pyrdi hapoh Parliament ha kani ka Monsoon Session.
Ka NCCOEEE kawa man leh kam ka seiñ ki wakreh hapoh ka ri wa em ha ki chnat bordiñ, da pynbna ko yei pyrchah wow pynman aiñ ya ka Electricity (Amendment) Bill 2021, deiwa sñiawthooh yei ktah kani ka aiñ ya ka chnat bordiñ.
Heiyatoh wa ini da dep leh wow thoh cha u Prime Minister ka India ha ka 16-07-21 heiwa ka NCCOEEE da klam che ko yei yieñ pyrchah ya kani ka Bill, deiwa pynbna leh ya ki yakhih deiwa pynman ya ki Strike/Work Boycott heiwa ha ka 10 tarik uni u bnai daw pynman ya ka Strike ha waroh kawi ka ri kawa chi sngi.
Kam i dak wow ya ksohkti lang wa kiwi ki wakreh hapoh ka ri kiwa em hapoh ka chnat bordiñ deilang wa ka NCCOEEE, ka Coordination Committee of Registered MeECL Associations and Unions (CCORMAU) leh da chim ko ya ka rai wow ya chimbynta lang ha kani ka Strike wa da khut ha waroh kawi ka ri deiwa pynman ya ka Strike hapoh waroh kawi ka jylla Meghalaya ha katai ka sngi.
Chooh chooh da pyntip wa neidaw wa em ka khlam COVID-19, ka CCORMAU u pyntikna ko wa waroh ki kaam wym hoi u dam u man ki kiwa lai bait wei ym pynthut yei saam bordiñ katwa ye.
