Jowai: Ka Punjab FC chirup wa ka Apollo Tyres da yakrehlang ki chirup wow thooh ya ki khynnah na kylleiñ ka ri ki wow chah hikai pynbniah ha ka yalehke Football kawa man kam chibynta wow pynkhreh ya ka neibynta ka lympung World Cup 2034.
Kam chibynta yong kani ka thong daw pynman ya i jied namo ka Trial ha ki ar district ka Ri-loom Jaiñtia neibynta ki khynnah kiwa hapoh 10 snem i rta.
Hawa yaklam wa u Ajoymeson Lyngdoh Syiem da pyntip u wa hadien wa chah jied ki khynnah daw soi ya ka Contract kawa 10 snem wei daw chah hikai pynjanai ki ha sorbah Chandigarh.
Kani ka Trial namo i jied ya ki khynnah kiwa em hapyrdi 6 wa 10 snem i rta u man ko ha ka 14 tarik uni u bnai nadooh i por 9:00 i step.
Neibynta ki khynnah ka East Jaiñtia ye ki u wan ha madan EJDFA Futsal Ground, Deinchynrum katwa ya ki khynnah wa na West Jaiñtia won ye ki u wan ha Madan Jrisaleiñ, Jowai.
Da kyntu leh wow wanlang chirup wa ki bei ki pa yong ki khynnah kamjooh leh wow rah ya ki Birth Certificate yong ki khynnah.
Ya ki khynnah u jied toh katkam ka sap wa em ha ki.
Kam wow pynkynmoo heini ha u snem wa dadep kiwa da lai chah hikai cha Chandigarh hapoh ka Punjab FC da em ki 5 ngut napoh jylla heiwa 3 ngut na ki toh kiwa na Ri-loom Jaiñtia.
U Ajoymeson da e khublei kyrpang u ya u montri ka sorkar jylla, u Kyrmen Shylla uwa da chynna jngai wow pynchlur u pynman ya kani ka trial. Chooh chooh da ekhublei u leh ya ki Football Club ka ri-loom Jaiñtia kiwa da ya embynta wow pynku ya kani ka yalehke haka thaaiñ.
Discussion about this post