Ka “Kur Biam Pyllun Eco-Socio Organisation Jaiñtia Hills” daw pynman ko ya ka yalang wa chisien chi snem namo ka Annual General Meeting ha ka 11 tarik uni u bnai ha chnong Laskeiñ kawa haap hapoh ka Unit Raliang heipor 10:00 waje i step.
Ha kani ka yalang ki waheh wa sian yong ka kur daw e ki yei klam i kapæ, i sneiñ i kroo ya ki khon ka kur hei akor burom, u im tip bru tip blai, u im hok im sot, kamjooh leh u lait na i chongsang chongmaa hei chongkha chongman.
Kamtæ neiliang u General Secretary, u Emkyrdan Biam da ong u, “Dei mynsien wa maya ya phi waroh ki payu para, ki para kur para jait yong Biam u sñiawbha phi ya wan chynnam cha kani ka Meeting yong i yoh i u yachem kam chikur chikmai, wei ngait skem O leh u yoh i chiboon i myntoi na kani ka yalang yong i.”
