Ka yung krehkaam u General Manager, District Commerce & Industries Centre, Jowai da khut sñiawbha ko ya phi waroh cha ka District Level Industrial Exhibition namo ka pynyoo rong ya ki tiar ki tar kawa ar sngi ka wow man haka 19 waka 20 tarik uni u Naitung (April) 2023 ha Ladthadlaboh Indoor Sport Hall, Madan Daimasi.
Daw em leh i pynyoo paidbah chaphang kiwa boon ki yarap wa yoh na ka sorkar wei kamjooh leh i ya dai ya theid ya ki tiar ki tar, ki mar baam mar dih wa boon jait kiwa da chna da ki bru wa ki seiñ kiwa da seiñ khih da ki hi, kiwa napoh West Jaiñtia Hills District wa na kiwi tawon ki District.
Daw em leh ki chnat sorkar waphær waphær kiwa daw wan pynsñiawthooh paidbah ya ki Scheme wa e yarap ki wei kamjooh leh i dai ya ki jait baam wa ki tiar wa da chna da ki chnat yong ki.
Heijooh i por, daw em leh i pyn ka-it ka-sar ya waroh ki wow wan cha kani ka Exhibition da kiwa tem wa paawnam ka chnong Jowai ki “Nexus”.
Ya katai ka Exhibition daw wan wai ha ka 19 tarik da u MLA ka Jowai, u Wailadmiki Shylla hei ya emlang u Deputy Commissioner ka West Jaiñtia Hills District, u B.S. Sohliya, IAS.
Kamtæ da khut sñiawbha ya phi sa chisieñ wow yawan cha kani ka Exhibition.
