Ka Seinraij Jowai deilang waka Seinraij Mynso da e ki ya kani ka wyrta chula cha ki khon ka bri u Niawtrep Niawskum wa ka Dorbar Niamtre wa 17 yong ki khon ka Ri 30 Syiem 12 Dolloi u man ko ha chnong Mynso ha ka 24 tarik wa ka 25 tarik Kmaichonglad (Dec) 2022.
Ha ki ar sngi yong kani ka Dorbar Niamtre daw em ki yalang wa kyrpang wa yatoh wa ka niam ka rukom, ka dustur riti heiwa ha ka sngi nyngkong yong kani ka Dorbar Niamtre ki waheh wasian yong ka Seinraij Mynso wa ka Seinraij Jowai u e ki i klam i kappæ chaphang ki yurim sikai niam katkam wa pynjooh sikai na warim neitæ ki kyntien sneiñ kyntien kroo wa ki kyntien e mynsien ya ki khon khynroo khyllood kiwa man ki mynried yong ka ri wa ka jaitbru katwa ha ka sngi wa bood won ha ka Bibar 25 tarik daw yoh i klam na ki waheh wasian hajrong ki phang wa yatoh wei man kyrpang ka jaitbru Niawtrep Niawskum wa ki chaad ki rwai sur tynre wow yachimbynta da ki Raij ki chnong waphær.
Kamtæ ka Seinraij Jowai deilang ka Seinraij Mynso khut sñiawbha ko ya waroh ki para khon ka Niamtre na kylleiñ ki chnong ki Raij yong ka bri u Niawtrep Niawskum wow wan sakhilang ya kani ka Dorbar Niamtre ka wow man ha Madan Lumiariang, Mynso, Laskein Block, West Jaiñtia Hills.
