Ki Ticket Lucky Draw yong ka Lion Sport & Youth Affair ka Dorbar Chnong Mission Compound, Jowai da pynlait paidbah ya ki ynnin i miet kam chibynta wow pynmih poisa neibynta u chna ya ka Community Hall ka chnong.
Ha ini i pynlait Ticket da emlang u Waheh Chnong kam u kongsan kamjooh leh ki dkhot ka EC deilang wa ki dkhot ka LSAYA.
Ha kani ka miet da pynbna leh wa daw pynman ya ka Rockustica Unplugged Music Competition ya kawa daw pynman haka 08-12-22 kam chibynta wow kyntu kynrong ya ki khon ka ri Jaiñtia wow yoh ki u pynyoo yei sap i phong yong ki hei rwai, hei put i tem.
Ya kini ki Ticket Lucky Draw daw pynkhle leh ha ka sngi wa pynman ya kani ka yakob heiwa ka 1st Prize toh ka Laptop, 2nd Prize ka Smart TV katwa ka 3rd Prize won toh ka Mobile Phone.
Heiyatoh wa kani ka Rockustica Unplugged Music Competition kiwa kwah u chibynta ye ki wow rwai ya kiwon kiwon ki jait sur wei yei ki wow rwai ha ka ktien Pnar, Khasi wa English donhi.
Ka yakob toh kawa da yabhah hei ar bynta heiwa nyngkong daw em ka Online Audition heiwa kiwa chimbynta hap ki wow phah yei tem ki namo ka Demo deiwa riñ ya iwa tem ki ym toh da kawa da dep Record da dep pynchna namo ka Edited Video. Toh u riñ bait kamwa tem hi wei wow phah lang ka yutip namo ka Profile yoh ki deiwa email ha [email protected] ha lane chwa ka 15-11-22.
Kani ka Demo toh u man ko du iwi dohhi i sur wei ka Video ym toh u heh ko palat 30MB i khia.
Daw em leh ka bai chimbynta kawa T. 200 (neibynta ar ngut) lada em palat ar ngut daw hap su pyntam T. 100 iwa mut lada em le ngut daw hap su T. 300, soo ngut T. 400 wei kamtæ ter ter.
Ya ka bai Entry Fee hap su lyngba ka Google Pay ha u Number: 7628067885.
Na kiwa wan e Demo daw jied 15 ngut ki wow lai chimbynta ha ka Final Round.
Kiwa jop daw yoh ki ya ka song-poisa kawa T. 30,000 katwa kiwa yoh wa ar u yoh ki T. 15,000 wei daw e leh T. 5000 neibynta ka Best Original Song.
