Nadooh wa sdang yaka Hornbill Festival ha Nagaland heiwa ha uni u snem da man ko ka sien wa 21 wa pynman yaka, haka sien wa nyngkong u pynman yaka dei wym yoh ki paidbah u chimbynta tangwa daw yoh u pait na yung ki lyngba ki TV Channel ka wow sdang nadooh ka 1 tarik u Kmaichonglad (Dec) hadooh ka 5 tarik hi u Kmaichonglad.
Daw pynyoo yaka haka 1 tarik (10:30 AM) wa 5 tarik (12:30 PM) ha NDTV 24X7, haka 1 tarik (11:30 AM) wa 3 tarik (3:30 PM) ha u NorthEast Live katwa haka Doordarshan Kendra (DDK) daw pynyoo haka 1 tarik (5:30 PM) wa 4 tarik (3:00 PM).
Kani ka tamasa toh kawa da siñ pyrtuid leh kam ka ‘Festival of Festivals’ da jooh pynman yaka 10 sngi yow booh yaka Nagaland kam kawi na ki thaw lai uiñke suwari wa pawnaam ym du hapoh ka ri kamjooh ya kiwa wan na baar ka ri deiwa pynyoo rong yaka dustur riti ka jylla, ki baam, ki that ki nep, ki tiar ki tar tynre, ka tem ka put wa kiwi kiwi.
Ha uni u snem leh daw pynyoo rong ya kini ki jooh tangwa u man ko kam ka Virtual Event kawa ki bru ye ki wow chimbynta deiwa chong ha yung.
Da pyntip wa da em 2,82,811 ngut kiwa da dep wan cha kani ka tamasa heiwa ha u 2019 da em 3015 ngut kiwa na baar jylla wa 55,584 kiwa napoh ka ri.
Ka kyrwoh naka sorkar Nagaland da ong ko leh wa kani ka tamasa da ye ko wow pynmih hadooh 8000 tylli ki kreh na ki kaam pynwyrngia wa 500 tylli kiwa da pynman ha ki 6 tylli ki District.
